Skip to main content

Sisimiut-Kangerlussuaq aamma periarfissaavoq

issittumi sakkutooqarfimmut ataqatigiissumut Sisimiut-Kangerlussuaq naleqqulluinnassaaq, Hermann Berthelsen isumaqarpoq 

 

Borgmester Hermann Berthelsenip Kommune Kujalleq taperserpaa, taassuma siunnersuutigimmagu Issittumi Sakkutooqarfiup inissinneqarfigisinnaasai pitsaasut tamaasa naalakkersuisut siulittaasuata Kuupik Kleistip misissortariaqarai.

Taamaattumik Qeqqata Kommuniata qilanaaraa naalakkersuisut siulittaasuata illersornissamullu ministerip Gitte Lillelund Bechip Sisimiuni Kangerlussuarmilu Issittumi Sakkutooqarfiup ataqatigiissup periarfissai qimerluualaassammatigit. Tamanna erserp0q Qeqqata Kommunianit tusagassiorfinnut nalunaarummi. Illersornissamut ministeri ullumi Nuummut tikippoq Issittumilu Sakkutooqarfiup illoqarfiit pingaarnersaanni periarfissai misissussallugit.

Hermann Berthelsenili aamma isumaqarpoq Sisimiut-Kangerlussuarni pissutsit ministerip aamma qimerloortariaqarai.

Borgmesteri malillugu nunarsuarmi tamarmi illersornissamut sakkutuunut taman ut anguniagaasariaqartoq sakkutuunik timmisartortartunik, imarsiortunik nunamiittunillu ataqatigiissumik sakkutooqarnissaq. Tamannalu pisinnaavoq Sisimiuni Kangerlussuarmilu.

- Atlantikup avannaani sakkutuut timmisartortartut pissutsinik pitsaanerusunik pioreersunik atugassaqarsinnaanngillat Kangerlussuarmiittutut ittunik. Nunarsuup ilaani sumiiffitsinni allaqanngilaq akornuteqanngitsumik taama timmisartorfiutigisinnaasumik taamalu takitigisumik mittarfilimmik, Hermann Berthelsen tikkuaavoq.

Taanna ilanngullugu isumaqarpoq sakkutuut Sisimiut-Kangerlussuup eqqaanisut periarfissanik pitsaatigisunik pissarsisinnaanngitsut, aasakkut pisuttuarfigilluarneqartartumik, ukiukkullu sisorartartunit, qimussersunit snescooterertunillu atorneqartartunik.

- Alapernaarsuisunut Sirius-imut ukioq naallugu Kangerlussuarmit Sermersuarmut qaqiffissaqarneq aamma atorneqarsinnaavoq sungiusarnernut il.il., taanna naliliivoq.

- Sisimiut Kangerlussuullu akornanni nunarujussuaq aallaavissaq periarfissarissaartitsivoq kalaalalit amerlanerusut sakkutuunngorniarnissaannut. Nunamimi tamaani qimusserpassualimmi snescootererpassualimmilu piginnaassuissat aallartinneqarsinnaapput, nunatsinni najugaqartuusugut inunngornitsinniilli pissarsiarisartakkavut. Kalaallit Nunaannummi imminut napatittumut pissusissamisuuginnassaaq nammineq nunatsinnik annertunerusumik illersueqataanissarput, borgmester Hermann Berthelsen oqarpoq.

Sakkutuunut imarsiortunut Sisimiuni umiarsualivik sikuneq ajortoq naleqqulluinnassaaq. Umiarsualivik taanna umiarsualiviit sikuneq ajortut avannarlersaraat taamaasillunilu Nordvestpassagemut Qeqertarsuullu eqqaani uuliaqarfinnut kiisalu Qalasersuarmut qaninnersaalluni. Tamatuma saniatigut Sisimiuni umiarsualivik sikuneq ajortoq umiarsuit takornariartaatit qitiusumik tikittarfiannut Iluissanut qaninnersaavoq, taamaattumik Sisimiut sakkutuunut imarsiortunut toqqagassaqqinnersaavoq, tassa umiarsuarnik takornariartaatinik ajutoortoqassagaluarpat sakkutooqarfik qanittumiissammat.

- Ataatsimut isigalugu Sisimiut-Kangerlussuaq pissusissamisoortumik toqqagassaassaaq, Naalagaaffeqatigiinni Forsvarskommado qanittukkut isummilerpat sakkutuut imarsiortut issittumilu sakkutuut inissinneqarfissaannik. Qeqqata Kommuniata naatsorsuutigaa naalakkersuisut siulittaasuata illersornissamullu ministerip Issittumi Sakkutooqarfiup ataqatigiissup Sisimiut Kangerlussuarlu inissiffissaattut minnerpaamik misissussagaat, Hermann Berthelsen oqarpoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER