Illuni radon-eqarnera eqqumaffiginiarneqalerpoq
Ineeqarnermut, Attaveqarnermut Angallannermullu Naalakkersuisoqarfimmiit aalajangerput, qanittukkut illuni radon.eqarnera pillugu paasititsiniaasoqassasoq
Paasititsiniaaneq illuutilinut sammitinneqassaaq, tassanilu Nunatsinni sumi illut iluini radon-eqarsinnaanersoq, qanoq illup misissortinnisssaa anguneqarsinnaanersoq kiisaluillup iluani radon-eqarnera qanoq annikillisarneqarsinnaanersoq.
- Nunanit allani innersuutigineqartut paasititsiniaanermut tuniliaqutaapput, taakkunani innersuussutigineqarpoq illut iluini annerpaamik kubikmeterimut 100 Bq. (Kubikmeterimut becquerel) killigitinneqassasoq, kiisalu Kalaallit Nunaanni misissuisarnernit paasisat aallaavigineqassallutik.
Ineqarnermut, Attaveqarnermut Angallannermullu Naalakkersuisoqarfimmiit tusagassiuutinut taamatut allagaqarput.
Allaaserineqartareernerata kingorna
AG-mi aasaq allaaserineqartareerpoq, nalunaarusiaq politikerit atorfilillu ukiuni tallimani qisuariarfiginngeriarlugu puiguinnarsimangaat, naak tassani uppernarsarneqaraluartoq Narsami illut arlallit gassimik kræfteqalersitsisinnaasumik, radon-imik ajornartorsiuteqarfiusut.
Naak radon puakkut kræfteqalersitisinnaangaluartoq, nunarsuatsinnilu peqqinnissamut suleqatigiiffik WHO naalagaaffiit radon akiorniarlugu suleriusissaminnik aaqqissuusseqqungaluarai, kommuni, ineqarnermut Naalakkersuisoqarfik imaluunniit Nunatsinni nakorsaaneq qisuariarsimanngillat. Politikerillu akisussaasuusut aamma qisuariarsimanatik.
Apriilip 20-anni AG-p Ineqarnermut, Attaveqarnermut Angallannermullu Naalakkersuisoq Jens B. Frederiksen, Demokraatineersoq, radon akiorniarlugu paasisallu aallaavigalugit qisuariartoqarsimannginnera pillugu apersoqqippaa.
- Maannakkorpiaq piffissaqanngilanga. Suliassaq pillugu aamma paasiniaaqqaartariaqarpunga, Jens B Frederiksen AG-mit sianerfigineqarluni taamani akivoq. Kingornalu utimut sianissalluni neriorsuilluni.
Akisussaasut qullersaat ulluni marlussunnitutsaqanngimmat AG-p sianerfigeqqippaa.
- Piffissaqanngilanga, Jens B. Frederiksen akeqqippoq.
Jens B. Frederiksen-ili Naalakkersuisoqarfianeersullu ullut ikittunnguit qaangiuttu piffissaqaleriataarsimallutik, illuni radon-eqarnera eqqumaffiginialerpaat.