NOAH: Aatsitassarsioqatigiiffimmit akissut naammaginanngitsoq
Greenland Minerals Ltd.-ip erseqqissaassutigaa Kuannersuarni nunap sajussinnaaneranut aarlerinaat nalilersuiffigisimagitsik. Kisianni naak nalunaarusiaq taanna, avatangiisinik illersuiniaqatigiiffik NOAH, allakkianik tunuliaqutaasunik tamanik takunnissinnaatitaanermut akuerineqarsimasoq, aperivoq.
Aatsitassarsioqatigiiffiup Greenland Minerals Ltd.-ip pisortaa, John Mair, aviisimi sapaatip-akunnerani kingullermi saqqummersumi oqarpoq, Aatsitassat pillugit Avatangiisinut Aqutsisoqarfiup VVM-imut missingiutaagallartumik avatangiisinik illersuiniaqatigiiffimmut NOAH-mut tunniussisimanera nuannarinngikkini.
Nuannarinninnginneq tamanna Niels Henrik Hoogep NOAH-meersup paasisinnaannginnerarpaa.
Aviisi Sermitsiaq taama allappoq.
– Allaanngivippoq John Mair isumaqartoq pisortat ingerlatsinerat pillugu paasitinneqarsinnaatitaanermut inatsimmi maleruagassat GML-imut atuutinngitsut. Aatsitassat pillugit Avatangiisinut Aqutsisoqarfik piumassuseqarnini pissutigiinnarlugu allagaatinik takunnissinnaatitaanermik akuersissutiginninngilaq, kisiannili taamaaliorluni tamatumunnga pisussaaffeqarnini pissutigalugu, tassa imaappoq pisortani oqartussatut inatsisitigut tunngavimmut inatsisinik tunngaveqanngitsunik aalajangiisinnaatitaannginnerup atuunnerata nalaanut qilersorneqarsimatilluni. Innuttaasut nalinginnaasut takunnissinnaatitaannginnerat aamma ilumuunngilaq. Aamma Aarhusimi isumaqatigiissutip, Aarhus Konventionen, avatangiisit pillugit paasissutissanik immikkut ittumik takunnissinnaatitsisup, Kalaallit Nunaanni atuutinnginnera maluginiagassaqqissuuvoq. Tamanna isumaqarpoq, Kuannersuarni suliniut assersuutigalugu Danmarkimiissimagaluarpat, Aarhus Konventionenip EU-mi inatsisit tunngavigalugit pituttuisuuffigisaani, taava GML pisortat ingerlatsinerat pillugu paasitinneqarsinnaanermut inatsimmi Kalaallit Nunaannut atuuttumi atuutinngitsunik tamanik iluaqutiginnissinnaassanngikkaluarpoq, Niels Henrik Hooge aviisimut Sermitsiamut oqarpoq
Allaaserisaq tamaat aviisimi Sermitsiami saqqummeqqammersumi atuarsinnaavat. Aviisi uani ataani pissarsiariuk: