Noah qiimanartunik saqqummersitseqqippoq
Tunisaalluartumik atuakkiortoq, Noah Mølgaard, nutaamik quianartunik imalimmik atuakkioqqippoq
Oqaatsinik quianartunik qiimassaataasinnaasunik amigaateqaruit atuagaq nutaaq 'Qaa, uummaalli¡ Hey du' atuarniariuk.
Taanna 60-nik qupperneqarpoq Noah Mølgaardimit allanneqarluni.
Atuagaq pisiniarfinni pisiarineqarsinnaalereerpoq, ukioq kingullermiillu saqqummersumit 'Koor’ Hold da op, mand'-imut malittaalluni.
- Malitsissaa allallugu nuanneqaaq, Noah Mølgaard oqarpoq.
- Allatakka nutsinngisaannarpakka. Nutserinermi isumaa kimeeruttarpoq, taamaattumik taanna pinaveersaarniarlugu quiasaarusiakka nutsinngisaannarpakka.
Oqaatsinik pinnguarsinnaanini aataaminit Abel Reimerimit kingornussimallugu oqarpoq.
- Ilulissani ikinngutikka aamma quiasaarisarninnut sunniuteqarluarput. Paasineqarmiarsinnaanngitsunimmi oqaluttarpugut, Noah Mølgaard oqaluttuarpoq.