Nivissat U18-it futsalimi GM-ernissaat taamaatinneqartoq
Nivissat U18-it ukioq manna nunatsinni pissartanngorniunnissaannut peqataaniarlutik nalunaarsimasut ikippallaarmata unammiuaarnissaq taamaatinneqqarpoq. Taamaattorli U18-imi iligiit arnat pissartanngorniunnerannut peqataaniarlutik nalunaarsinnaapput.
Nivissat U18-it futsalimi nunatsinni pissartanngorniunnissaannut iligiit pingasuinnaat peqataaniarlutik nalunaarsimammata, arsaattartut kattuffiata KAK-p unammiuaarnissaq, Ilulissani sapaatip-akunnerani 13-imi ingerlanneqartussaagaluartoq, taamaatippaa.
Ilulissani timersoqatigiiffimmit I-69-imit iligiit marluk Nuummilu NÛK-mit iligiit unammiuaarnermut peqataaniarlutik nalunaarsmagaluarput, KAK-mi siunnersorti, Niisinnguaq Geisler, Sermitsiaq.AG-mut oqarpoq.
Nivissalli U18-it unammiuaarnermi allami peqataanissamut periarfissinneqarput.
- Iligiit peqataaniarlutik nalunaarsimagaluartut arnat nunatsinni pissartanngorniunneranni, Nuummi sapaatip-akunnerani 14-imi ingerlanneqartussani, peqataasinnaapput, Niisinnguaq Geisler paasissutissiivoq.
Taanna nalunaarpoq, NÛK-mi nivissat U18-it unammiuaarnermut peqataaniarlutik nalunaarsimasut.