internetsi
Nivissat atisaqarpianngitsut Facebookikkut saqqummeqqittut
Naammagittaalliortoqareerneratigut Facebookimi qupperneq 'Niviaaluit' peerneqaraluarpoq. Facebookimili inatsisit avaqqullugit nutaamik ikkussisoqaqqippoq
Sermitsiaq.AG-mi marsimi 'Kalaallit inuusuttuaqqat atisaqarpiaratik nittarsaattut' allaaseraat, tassani niviaaluit nukappissallu inuusuttuaqqat atisaqarpiarnatik assiutiminnik Facebookimi ikkussisalersimanerat sammineqarluni. Ilaallu aamma kiinartik ilarsarnarunnaarsarnagu assinik ikkussisarput Facebookip qupperneranni 'Nukappissat'-ni 'Niviaaluit'-nilu.
Assit Facebookimi takuneqarsinnaanerat mamiatsaatigineqaqaaq maanilu quppernermi assit pillugit oqallittoqangaatsiarluni.
Facebookillu 'Niviaaluit' takuneqarsinnaajunnaarlugit matusimavaat, apriililli 17-ani nutaamik 'Niviaaluit' ammarneqaqqippoq
Naligiissitaanermut siunnersuisooqatigiit allattoqarfianni Arpaartinit Sermitsiaq.AG-mi ilaatigut ima oqaaseqarput:
- Arpaartit ilimagilluinnarpaat niviarsiaqqat nukappiaqqallu ilaat tassanngaannaq pileritsariasaarnikkut taamaasiorsimassasut. Eqqarsaatigisimagunanngilaat assit taakku qaqugorsuarmut internettimiittussaasut Facebookimi quppernerit taakku
matuneqassagaluarpataluunniit.
- Angajoqqaanut assut kaammattuutigerusupparput eqqumaffiginiaqqullugu qitornatik internettimi susarnerat. Taamatut nittarsaannerup kinguneranik niviarsiaqqat nukappiaqqallu atornerloriarneqarsinnaapput, Naligiissitaanermut siunnersuisooqatigiit allattoqarfianni pisortaq Inge Olsvig Brandt oqarpoq.