Toqusoq
Niviarsiaqqap inuusuttuaqqap toqunera suli nalornissutigineqarpoq
Niviarsiaraq inuusuttuaraq Nanortalimmi arfininngormat toqungasoq nassaarineqartoq pillugu suliami politiit innuttaasunit amerlasuunit saaffigineqarsimapput.
- Innuttaasut uagutsinnut qisuariallaqqillutillu saaffiginnilluarsimapput, kisianni ajoraluartumik maanna misissuinermi atorsinnaasatsinnik peqanngilaq, politikommissær Jack Nathansen Sermitsiaq.AG-mut oqarpoq.
Toqutsinertut misissorneqartoq
Politiit toqutsisoqarsimasutut misissuineq ingerlappaat, taamaammallu toqusunik misissuisartunik aamma teknikerinik marlunnik Københavnimeersunik aggersaallutik.
- Suli tikinngillat. Sila pissutigalugu kinguaattooqqapput, politikommissær taama ilisimatitsivoq.
Jack Nathansenip pisoq aalajangersimasoq paasisaqarfigerusuppaa, innuttaasut immaqa ilaat ikiuisinnaapput.
- Paasivarput unnuakkut nalunaaqutaq 02.00 umiarsualivimmi nipiliortoqarsimavoq. Arlaata suna pissutaanersoq nalunngippagu, taava tusarusuttorujussuuarput, Jack Nathansen oqarpoq, taanna normumut: 701123-mut sianeqqusivoq.
Pasisaqartoqanngitsoq
Umiarsualiviup eqqaani videonik nakkutilliivinneersinnaasunik politiit ujartuipput.
- Umiarsualivimmi aalisakkeriviup eqqaani videoliuut ataasiinnaasoq paasinarsivoq, taannalu aserornikuusimavoq, politikommissæri ilisimatitsivoq.
Suliami suli pasisaqartoqanngitsoq taassuma naqissuserpaa.