Niviaq nersornaaserneqarnissamut innersuunneqaqqippoq

Niviaq Korneliussenip atuakkiaa 'Naasuliardarpi' sisamassaa nersornaasigassatut innersuunneqarpoq.

Atuagaq nunani Avannarlerni atuakkiortunut nersornaammut innersuunneqartoq ullumi sisamanngornermi nalunaarutigineqarpoq. Nersonaatinut allanut pingasunut innersuussaareerpoq, tassa Politikens Litteraturprisimut, Montanas Litteraturprisimut kiisalu Kritikerprisenimut.

Atuakkiaa siulleq 'Homo Sapienne' 2015-imi aamma Avannarlerni atuakkiortunut nersornaammut innersuunneqarpoq.

Soqutiginarsarneqarsinnaasoq

- Atuakkap innersuunneqaqqinnera soorunami nuannaarutigaara. Nunatsinni atuakkanik saqqummersinneqartartut ikittuaraapput, taamaattumik innersuunneqarnera atuakkiortussanut soqutiginarsaasinnaasoq neriuutigaara. Atuagaq aamma innersuunneqarninnut nunani avannarlerni soqutigineqarnerulernissaa neriuutigaara, Niviaq Korneliussen Sermitsiaq.AG-mut oqarpoq.

Atuakkiortoq maanna Maniitsumiippoq, tassani imminut toquttarnermut akiuiniarnermi saqqummiiartorluni. Ilulissani assingusumik aamma saqqummiussissaaq, aqagu Ilulissanut aallassalluni.

- Atuakkiara pillugu aamma saqqummiussisassallunga naatsorsuutigaara. Taamaattumik kommunit allat aamma soqutiginnilernissaat neriuutigaara, oqarpoq.

Atuakkioqqissaaq

Atuakkiani siulleq 'Homo Sapienne' saqqummersereerlugu 'Naasuliardarpi' ukiut tallimat qaangiuttut saqqummerpoq.

- Ukiut taama amerlatigisut saqqummersitseqqinnissanut naatsorsuuteqanngilanga. Atuakkioqqissaanga, taanna allallugu aallartilaareerpara. Sumut sammissanersoq oqaatigisinnaanngikkallarpara, taamaattoq saqqummersinnikuusannit allaanerussasoq oqaatigisinnaavara. Ukiut marluk missaa qaangiuppata saqqummernissaa naatsorsuutigaara, Niviaq Korneliussen oqarpoq.

Nunani Avannarlerni atuakkiortunut nersornaasiineq Københavnimi novembarip aappaan tunniunneqassaaq. Ajugaasoq 300.000 koruuninik akissarsitinneqassaaq.