Niviaq aamma Apannguaq MIO-mit nersornaaserneqarput
MIO-p nersornaasiuttangaa ukioq manna inunnut marlunnut tunniunneqassaaq. Taakku meeqqat pisinnaatitaaffiisa paasineqarnerunissaannik meeqqallu inuuniarnermikkut atukkatigut pitsanngorsaavigineqarnissaannik sulissuteqarsimapput.
Atuakkiortoq Niviaq Korneliussen MIO-p nersornaasiuttangaanik ukioq manna nersornaaserneqassaaq, suiaassuseqarnerup, atoqatigiinnerup aamma imminortarnerup paqumigiunnaarlugit oqaloqatigiissutigineqarnissaannut suliniaqarnerminut nersorneqarluni.
MIO tusagassiorfinnut taama ilisimatitsivoq.
- Namminiusinnaanerup sammineqarnissaanik aamma sulissuteqarsimavoq. Taassuma saniatigut inuusuttut akornanni oqaluuseriumaneqanngitsut annertunerpaat ilaat oqaluuseritillugu aallartissimavaa, tassalu: Imminortarneq. Imminortarnerup paquminartutut isigineqarunnaarnissaa kiisalu inuusuttunut ikiorsiinerup eqqortup pigineqalernissaa sulissutigisimallugit, MIO-p nersornaasiuttagaannik nersornaasiinissamut tunngavilersuutigineqarpoq.
Nersornaaserneqartup aappaa
Lærerstuderende Apannguaq Lynge Tellesen fra Ikamiut hædres for sin ekstraordinære indsats i bygden.
- Apannguaq Lynge Tellesen arnaavoq inuusuttoq nukittooq, nunaqarfimmi oqallitsitsilersinnaasoq kiisalu Naalagaaffiit Peqatigiit Meeqqat pillugit Isumaqatigiissutaat pillugu meeqqanik inersimasunillu ilinniartitsisartoq. MIO-p saqqummersitai killiliinermut tunngasut atorlugit meeqqanik inersimasunillu sulitilluni sunngiffimminilu ilinniartitsisarpoq, tunngavilersuutigineqarpoq.
MIO-p nersornaasiuttagaa ukiut tamaasa novemberimi tunniunneqartarpoq. Nersornaasiinermi diplom aamma check 10.000 koruuninik aningaasartalik, NunaFondenimit tapiiffigineqartoq, tunniunneqartarput.
Uku aamma nersornaaserneqarsimapput:
MIO-p nersornaasiuttagaa 2017: Peqatigiiffik Qajaq
MIO-p nersornaasiuttagaa 2018: DIH-mi meeqqanut immikkoortortaqarfik
MIO-p nersornaasiuttagaa 2019: Ilaqutariit Høyer Broberg