Nivi: Tuluttoornerup utaqqisinnissaanut akissaqanngilagut

- Pimoorukkiga tusaasinnaavat. Ilinniarnermut naalakkersuisoq Odensemi ilinniarneq pillugu saqqummersitsisoqarnerani pileritsaqqarpasittoq naapippara.

Tuaviuunneqartariaqarpoq
Taassuma parteeqataata Tillie Martinussenip (D), uani nittartakkami isornartorsiuineranut taanna qisuariarpoq.

Atuaruk: Tillie: Tuluttoorneq utaqqisilli

Ajornartorsiuterpassuit iluarseqqaartinnagit, meeqqat atuarfianni tuluttoortarneq salliutinneqarnissaa utaqqisinneqartariaqartoq, Tillie Martinussen isumaqarpoq. Kisianni Nivi Olsen (D) tamatumunnga utaqqinissamut piffissaqanngivippoq.

- Takorluugara saqqummiukkakku aalassannartumik saqqummiussillunga ilisimavara, taanna oqarpoq.

Atuaruk: Qallunaat oqaasii atorneqarpallaarunnaassapput

Nukissanik atornerluineq
Aallartinnissamut ukiuni tallimani utaqqisoqassappat pilersaarut piffissaligaanngitsumik unitsikkallarneqarnissaa, ilinniarnermut naalakkersuisup ernumassutigaa. Taamaamma ukiut marluk qaangiuppata piareerluni aallartinnissamik eqqarsaat attatiinnarpaa.

- Utaqqinissatsinnut piffissaqanngilagut. Silarsuaq sukkasuumik ineriartorpoq, taanna naqissusiivoq.

- Ilinniarnitta pitsaassusaa appasippallaaqimmat, nukissagut asuliinnaq atorpagut. Mattuniartariaqarpugut.

Atuaruk: Ineqi: Tuluttoorneq qallunaatoornermit amerlanerusunik periarfissaqartitsivoq

Tuluit oqaasii takornartat oqaasiini salliutinneqalinnginnerini, kalaallisut ilinniartitsineq siullermik pitsanngortinneqaqqaartariaqarneranik tunngavilersuinermut taamaammat isumaqataanngilaq.

- Maanna mattuniarnerulaartariaqarpugut. Tassami iluarsisassagut iluarsiutigalugit nutaanik iliuuseqarsinnaasugut isumaqarpunga, taanna naqissusiivoq.

1. klassimi tuluttoorneq
Nivi Olsenip tuluttoorneq 1. klassimi aallartittarnissaa takorloorpaa, siusinnerussanngippat. Meeqqat mikitillutik oqaatsinik takornartanik pissusissamisoortumik ilinniartartut tunngavilersuutigaa. Kisianni tamanna aqqaneq-marluk missaani ukioqaleraangamik unittarnerarpaa.

Taamaammat tuluttoortarneq 4. klassimi ullumikkut aallartittarnera kingusippallaarnerarpaa.

- Sisimiuni tuluttoortarneq 1. klassimi aallartinneqareerpoq. Naalakkersuisut kommuninit katataassanngillat, aqqutissiuisussaapput, Nivi Olsen oqarpoq.

Atuaruk: Siumup inuusuttai: Qallunaat oqaasiisa akimmisaarpaatigut

Qallunaatuullaqqinnerulerneq
Nivi Olsenip aamma innuttaasut qallunaatut oqaluttut ernumassutaat toqqissisaaviginiarsarai. Tassami tuluttoortaliaarneq aamma qallunaatuullaqqinnerulersitsisinnaasoq isumaqarpoq.

- Oqaatsinut allanut pikkorissooreeraanni, oqaatsinik takornartanik ilikkarniarneq ajornannginnerusartoq ilisimavarput, taanna oqarpoq.

Tuluit oqaasii takornartat oqaasiini salliutinneqalernissaanut qanoq iliortoqartariaqarnersoq, maanna ilisimasalinnik eqimattanik misissuisussanik taanna pilersitsivoq.

- Pilersaarutit ersarinnerusut ilusilersorneqalerpata soorunami taakku tusarnaassavakka, Nivi Olsen oqarpoq, pilersaarutit piviusunngornissaat ukiunik pingasunik sivisussuseqassagaluarpata aamma akuerisinnaallugu oqaatigaa.

Ilinniartitsisut tikisinneqassapput
Taassuma ilinniartitsisut tuluttoortitsisinnaasut naammanngitsut maluginiarpaa. Taamaammat allannguiartornermi tuluttoortitsisartunik pikkorissunik avataanit tikisitsisoqartariaqarpoq. Danmarkimeersinnaapput imaluunniit nunanit allanit. Tamatuma saniatigut Ilinniarfissuarmi pikkorissunik tuluttoortitsisussanik ilinniartitsisoqartariaqarpoq.

Naapeqatigiinneq
Taassuma aamma ilaatigut parteeqatiminut Tillie Martinussenip tunngavilersuutaanut Inatsisartuni tusarnaassalluni oqaatigaa.

- Pisariaqassappat naapeqatigiinnissamut piareersimavunga. Kisianni Kalaallit Nunaat nunani tamalaani ingerlalluassappat, sivisuallaamik utaqqisinnaanngitsugut maanna oqaatigeqqissavara, ilinniarnermut naalakkersuisoq Nivi Olsen naqissusiivoq.

Una allaaserisaq ingerlaannaq kalaallisuunngorlugu nutserneqarsimannginnera isornartorsiorneqarpoq. Sermitsiaq.AG-p pisoq ajuusaarutigaa, kisianni nutserisugut ajoraluartumik ulapiinnavittariaqartarput, allaaserisallu nutserneqarnissaat ilaanni sivisusinnaasarpoq. Neriuppugut paasisinnaagissi.