Nivi Saramut: Isornartoriuinerit tunngavissaqanngilluinnarpoq
Sara Olsvigip politikkiikkunnaarniarluni aalajangernerminut atatillugu oqalugiarnermini Inatsisartut isornartorsiorpai, tamanna Demokraatinit Nivi Olsenimit paasiuminaatsinneqarpoq
Inuit Ataqatigiinnit Sara Olsvigip aamma Aaja Chemnitz Larsenip Inatsisartunut ilaasortanut isornatorsiuinerat Nivi Olsenimit (D) paasiuminaatsinneqarpoq.
'Partiit akornanni silaannaq iluanngitsuusoq' kiisalu 'ungdomsklubbiusoq' ilaatigut isornartorsiuisoqarpoq.
- Uanga oqaatigisinnaanngilluinnarpara suliffimmi pissutsit, pimoorussineq, tunngavilersuisarneq aamma IA-p iluani inuusuttut klubbiattut pissusilersornerit qanoq issimanersut. IA-p tamanna nammineq iluarsiniartariaqarpaa. Paarlattuanik oqaaseqarfigisinnaavara Inatsisartuni naliginnaasumik qanoq pissuseqartoqarnersoq.
- Uanga isumaga naapertorlugu partiimi sumiikkaluaruttaluunniit immmitsinnut ataqqivugut. Partiit allaffiinut pulaarsaasarpugut, illaqatigiittarpugut, kaffisoqatigiittarpugut aamma naliginnaasumik peqatigiillaqqissuuvugut ataqqeqatigiillutalu suleqatigiilluta ataatsimiititaliani assigiinngitsuni, Nivi Olsen tusagassiutinut nalunaarummi allappoq.
Inuit Ataqatigiinnit sooq taama isornartorsiuisoqarnersoq Nivi Olsenimit paasiuminaatsinneqarpoq.
- IA-p politikkerput isornartorsiukuttoorsinnaavaa kisianni oqarsinnaanngilaq pimoorussinngitsugut tunngavilersuinerlu ajorluta, inuusuttut klubberigaatigut - isumaqarpunga tamanna kanngutsaattuliornerusoq aamma uangut politikerit taamaasilluni isiginerlutsinniarsaraatigut. Isumaqarpunga IA ingasattajaarpallaaluatsiartoq, Nivi Olsen ilaatigut oqarpoq.