Skip to main content

Nivi Olsen: Akitsuusiineq pilliuteqalaarneruvoq

Sulinermi ilanngaatip atorneqarneranut aamma suliffeqarfiit akileraartarnerisa 5 procentimik annikillisinneqarnissaannut tunngatillugu, akitsuusiineq pilliuteqalaarnerusoq, Nivi Olsen Demokraatineersoq oqarpoq.

- Isumaqarpunga uagut ilutsinni torrallaaneruvoq taamatut iliorneq, pissutigalugu tunniussatsinninngaanniit pinnatagut annertunerujussuusussaammata, oqarpoq.

Demokraatineersoq Nivi Olsen isumaqarpoq mamakujuttut, imigassat cigarettillu akitsuutaasa qaffanneqarnerat partiimi inuiaqatigiinnilu pilliuteqarnerusoq annikitsoq.

- Nalunngittuaannarparput sumiluunniit politikkimi pilliuteqartuaannartariaqartugut, uanilu taamaaliorpugut, Nivi Olsen (D) oqarpoq.

Taassuma akitsuutit qaffanneqarnerat illersorpaa, eqqaamaqqusillunilu arlaannik piumasaqaraanni aamma allamik pilliuteqartoqartariaqartoq.

- Qineqqusaarnerup nalaani Demokraatit arlaleriarlutik oqartarput akitsuutit naammalertut, akitsuusiisoqassanngitsorlu. Akitsuutinut maanna akuersinissinni politikkersi pilliutigaasiuk?

- Isumaqatiginninniarnermi pilliutigisimasagut ilaatigut tupamut, imigassamut mamakujuttunullu akitsuuseeqqilaarneq, akitsuummik qaffaaqqilaarneq peqataaffigisimavarput politikkimi anguniakkagut perusutagullu tikitserlugit. Taannalu isumaqanngilanga pingaartitatsinniit qimaanerusoq, imaluunniit pingaartitatsinnik pilliutiginninnerusoq, Nivi Olsen oqarpoq.

Anguniakkat

Akitsuutit qaffanneqarneratigut sulinermut ilanngaat aningaasalersorneqarsinnaalissaaq. Suliffeqarfiit akileraartarnerat 5 procentimik apparneqarsinnaalissalluni, paaqqinnittarfinnilu perorsaasut amerlanerulersinniarlugit suliniutit aallartissinnaalissallutik.

- Sulinermut ilanngaat eqqarsaatigiinnarluguluunniit, inuit sulillutik aningaasat tigusartagaat amerlanerusariaqarput, taannalu akisoorujussuuvoq aamma inuiaqatigiinnut. Kisianni taava peqqinnissamut ajornartorsiutigut aallaaveqartut, sukkumik, peqqinnanngitsunik nerisassanik, imigassamik cigarettimillu, taakkua qaffaavigilaarneratigut suli akissaqalerpugut inuiaqatigiit kaasarfiinut ikisinissamut, nassuiaavoq.

- Aamma eqqaamasariaqarparput paaqqinnittarfinni perorsaasut amigaatigineqarput. Demokraatinut pingaaruteqarpoq anaana ataatalu sulisinnaasut, meeqqap toqqissisimanartumik qimatsivigissaqartillugit, akitsuutillu qaffalaarneqarneranni tamanna aamma aningaasalersorneqarsinnaavoq.

- Siunnersuutersi malillugu nioqqutissat ilaat akitsuuserneqarput innuttaasut peqqinnerulernissaat anguniarlugu taamatullu innuttaasut taakkuninnga pisinnginnerulernissaat anguniarlugu. Akitsuusikkanik atuineq annikillippat aningaasat suminngaanniit taava aaneqassagamik?

- Nuannaartorujussuussuunga mamakujuttut, cigarettit imigassallu pisiarinikinnerulerpata. Tamanna peqqinnarpoq, taamaattumik nuannaartorujussuussuunga. Innuttaasut peqqinnerulerpata, taava aamma peqqinnissaqarfimmut aningaasartuutit annikinnerulissapput. Pisariaqalissappalli tamanna aamma misissorneqartariaqarpoq, anguniakkallu qanoq aningaasalersorneqarnissaat misissorneqaqqittariaqarluni, Nivi Olsen oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER