Nivi Olsen folketingimut qinigassanngortippoq

Demokraatit partiini kisiartaallutik folketingimut qinigassanngortittumik nalunaaruteqarsimanngillat.

Partii suli manna tikillugu pisortatigoortumik nalunaaruteqanngilaq, partiimili nuimanersat ilaat sassarpoq. Nivi Olsen facebookimi qinigassanngortilluni allappoq.

Atornerluisimasunut sakkortunerusumik kinguneqartitsisalernissaq piumasaringaa.

- Meeqqanik atornerluisarnerit isumakkeerfigineqarsinnaanngillat unitsinneqartariaqarlutillu. Meeqqavut nunatta pingaarnersaatut isumalluutigai.

Tassunga atatillugu qinigaassangaluaruni pinerluuteqarsimasunut sakkortunerusumik kinguneqartitsisoqartalernissaa sulissutiginiarpaa.

- Ilumoorsinnaanngilaq meeqqamik atornerluisimasoq qaammatialunnguaannaat Pineqaatissinneqarsimasunut Inissiisarfimmeereerluni aqqusinermi naapinneqarsinnaasoq.

Ippassaq tusagassiutinut nalunaarummi Nivi Olsen allappoq, meeqqat kinguaassiutitigut kanngutsaattuliorfigineqartarnerinut akiuiniarluni suliniarnermi Qallunaat Nunaannut ikioqqusoqartariaqartoq.

- Inuiaqatigiittut nakimaanniarnerput iperariartigu
isumaqarunnaarlutalu suna tamaat sapernatigu. Ilinniarluarsimasunik amingaatilerujussuuvugut
taamaasillutalu assigiinngitsunut ilisimasalinnik aamma amingaateqarluta.

Taamaammat Naalakkersuisut ilinniarsimasunik immikkullu ilisimasalinnik Kalaallit Nunaannukartitsisoqarnissaa pillugu Qallunaat Nunaannut isumaqatiginninniarnissaanik kaammattuivoq.