meeqqat atuarfiat
Nivi Olsen: Atuarfitsialak atuutinngilaq
'Atuarfitsialak' pisortatigoortumik ukiut qulit sinnerlugit matuma siorna atuutilersinneqarpoq. Maanna Nivi Olsen erseqqissaassuteqarpoq: Pilersaarut – maannamut iluatsissimanngilaq
Ilinniartitaanermut politikkikkut akisussaasut qullersaat Demokraatineersoq Nivi Olsen atuarfeqarnermik sakkortuumik naliliivoq.
- ‘Atuarfitsialak’ pappialatiguinnaq atuuppoq. Aatsaat eqqukkiartuaalerparput, Inatsisartunut ilaasortat nunatsinni atuarfinni ilinniusiat qaffasissussaannik sapaatip-akunnerani kingullermi oqaluuserinnimmata taanna oqarpoq.
IA-mit Nivi Olsen taama aalajangersimatigisumik oqaaseqarnera pillugu avoqqaarineqarpoq.
Atuaruk: Meeqqat atuarfiat tunniutiinnartoq
IA isumaqataanngitsoq
- ‘Atuarfitsialaap’ piviusuni piunani pappialaannartigut piuneranik oqarneq isumaqatiginngilara. Eqqaasitsissutigerusuppara angajoqqaarpassuaqarmat allanillu inersimasorpassuaqarmat atuarfimmik kivitsisunik. Suliap tamatuma nangillugu ingerlateqqinnissaa pingaaruteqartorujussuuvoq, Inuit Ataqatigiit ilinniartitaanermut tunngasuni oqaaseqartartuat, Mimi Karlsen, oqarpoq.
Siumumeersoq Ineqi Kielsen atuarfimmik aamma illersuivoq:
- ‘Atuarfitsialammit’ perorsagaasimasunut ilaaninnik oqarsinnaasarnera ilaatigooriarlunga tulluusimaarutigisaqaara. Immaqa amerlavallaanngilagut. Meeqqat atuarfiannit 2009-mi naammassillunga atuarunnaarpunga, atuarfillu uannut ajunngilluinnartuuvoq; ilaatigut taanna pissutigerpiarlugu ullumikkut Inatsisartuniippunga, Inatsisartunut ilaasortat nukarlersaat oqarpoq.
Atuaruk: Atuarfiit ineriartortinnissaannut pilersaarut nutaaq borgmesterip tatigaa
Atuarfinni arlalinni atulersimanngitsoq
Nivi Olsenilli oqaatigisani aalajangiusimavai:
- Manna isumaqatigiinngissutigisariaqanngilarput. Ilisimatusartunit ‘atuarfitsialak’ misissuiffigineqarsimavoq, tunngavissallu atuarfiit amerlanerpaartaanni atorneqalersimannginnerat uppernarsineqarsimalluni. Atuarfiit ataasiakkaat pikkorissunik eqqummaarissunillu aqutsisoqarput, tunngavissanik eqqussisinnaasimasumik. Taakkua qanoq ililluta nalinginnaasumik pitsaanerusumik suliaqarsinnaanitta oqaluuserineranut aallaavittut atortariaqarpavut, oqarpoq.
Atuaruk: Atuarfiit pisortaat Nivi Olsenip saassuppai
Allaaserisaq tamaat AG-mi saqqummersumi kingullermi atuaruk. Aviisi uani pisiariuk: