Skip to main content

Nive isiginnaartitsisarfimmi isiginnaartitseqataassasoq

Arlalinnik piginnaasasalik Nive Nielsen Københavnimi Aveny-T-mi C.V. Jørgensenip erinniai tunngavigalugit takutitseqataassaaq

Nive Nielsenip CV-minut sunaluunniit ilannguteriaannanngorunarpaa. Tassunga isiginnaartitsisarfimmi isiginnaartitsisartuuneq ilanngussinnaanngulerpaa.

Maajimmi aallaqqaataani C.V. Jørgensenip erinniai tunngavigalugit Københavnimi Avwny-T-mi isiginnaartitsinermut peqataasussanngorpoq.

- Uannut nutaarluinnaasumik allaalluinnaasumillu misiliinissara qilanaarisupilussuuara. Tamatumunnga atatillugu sorpassuit toqqissisimanaraakka. Nipilersussaangami, arlaleriarlungalu isiginnaartitsisareerlunga, Nive Nielsen Sermitsiaq.AG-mut oqarpoq.

Cafémi Aveny T-mut ungasinngitsumiittumi naapippugut. Nunarsuarmioq  ive Nielsen aatsaavissuaq Københavnimi najugaqarallalerpoq. Aallaqqaammut uini marluliaatinilu peqatigalugit aqquserngup illuatungaani najugaqarallassapput. Taamaalilluni isiginnaartitsisarfimmi sungiusarnerit aallartippata qanittunnguami najugaqassalluni.

- Ilisarnarlunilu allaanerusussaavoq, isiginnaartitseqataasarninnimi arlaleriarluta uneqqattaartarpugut naatsumillu takusassiaqartarluta. Taamaammat sivisuumik piareersarsimalluni aamma tv-kkut filmitigullu isiginnaagassiassanik suliaqarnermit allaanerusumik ingerlatsinissaq pisssanganarpoq.

Nipilersornerup isiginnaartitsinerullu assigiissusaat

Nive Nielsen filmiliaritittartutut misilittagaqarlualereerpoq. Filmi 'Terror' peqataaffigeriarlugu kingulleq peqataaffigisaa 'Togo' Disney-p aallakaatitsisarfiatigut qanittukkut takuteqqaarneqarpoq.  Isiginnaagassiani marlunni maanna takkutingajalersuni aamma peqataasimavoq.

- Nipilersortartuunerup isiginnaartitsisartuunerullu qanoq assigiitsigineri takullugu tupaallannarsimavoq, Arlalitsigut assigiissuseqarput.

Isiginnaartitsisartut aamma nipilersortartuusut

 Nicolaj Cederholm Gasolinip nipilersuutai tunngavigalugit taamatut isiginnaagassiornissamik aallarniisimasoq C.V. Jørgensenip erinarsuutai tunngavigalugit isiginnaartitsinissamut  ilitsersuisuuvoq. C.V. Jørgensenip nipilersuusiaasa taamatut atorneqarsinnaanerinut akuerineqarnissamut ukiorpassuit atorneqarsimapput.

Isiginnaartitsisartutut peqataasut erinarsortartuullutillu nipilersortartuupput, tassa immikkut nipilersortussanik pissarsiniartoqartariaqarani.

C.V. Jørgensenitut nipeqarnissaq piumasaqaataanngilaq, Nivelumi taannatut nipeqanngilluinnarpoq.

- Paasinninnera malillugu nipilersuut isiginnaartitsinermutilaavoq, tassa tusarnaartitsilluartutut nipeqaannarani isiginnaartitsinerussaaq.

Det har taget tid, at overtale C.V. Jørgensen til, at hans musik må bruges i en teaterkoncert
Torben Christensen/Ritzau Scanpix

- C.V. immikkuullarissuuvoq

Danskit nipilersuusiaat Nive Nielsenip nalinginnaasumik sammineq ajoraluarpai.

- Danskit nipilersuusiaannik tusarnaarpallaarneq ajorpunga. Isumaqarpungali C.V. Jørgensen immikkuullarissuusoq. Nipilersuusiai tusartakkannit amerlanerusunit allatut isumaqartarput.

Naapissimavaalumi.

- Quianalaarpoq, nipilersoqatigisartakkakkami peqatigalugit Danmarkimi tusarnaartitseqqaaratta, C.V. Jørgensen ukiuni qulini nipilersorsimanngitsoq sioqqutilaarlugu nipilersorpugut.

- Taamanikkut tusarnaartitsereersoq naapippara. Assut nuannerpoq, isumaqarpungalu taalliai soqutiginartuusut nipilersortarneralu nuannersuusoq.

- Taamaammat taassuma erinniarippagit danskisut erinarsornissara ajorinngivippara, naggasiilluni oqarpoq ilaaqqunnartumillu illalerluni.

Isiginnaagassiaq maajip juunillu qaammataanni Københavnimi takutinneqareerpat Aarhusimut ingerlaqqissapput.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER