Skip to main content

Niuertoq tusaamanerlugaasoq nunatsinni peqquserluttuliortoq

Sanasut suliffeqarfinnit maanna pinngitsaaliissummik atorunnaarsinniarneqartunit uukapaatinneqartutut peqquserluffigineqartutullu misigisimapput.

Qallunaat sanasut arlalissuit, Kalaallit Nunaanni suliassanik isumaginnittussatut sulisussarsiarineqarsimasut, koruuninik tuusinterpassuarnik peqquserluffigineqarsimapput.

Pasilliutit suliffeqarfinnut Grønlands Byggeservice ApS-imut aamma Din Bygge Service Grønland IVS-imut, nunatsinni sanaartornermik suliassanut sulisussanik attartortitsisartunut, sammitinneqarput.

Sermitsiaq.AG taamaalilluni sanasunit saaffiginnissutinik tigusaqarsimavugut, taakkualu oqaluttuarput, akissarsianik feeriarnersiutissanillu isumaqatigiissutigineqarsimasunik tigusaqarsimanatik. Ajornartorsiut pillugu oqaloqateqarniaraluaraangamik utoqqatsissutinik, akornusersuinernik siorasaarutinillu naapitassaqartarput, sanasunit, aaqqissuisoqarfimmit kikkuunneri ilisimaneqartunit, oqaatigineqarpoq.

Ingerlatseqatigiiffinnut marlunnut, maanna pinngitsaaliissummik atorunnaarsikkiartuaarneqartunut, tunuliaqutaapput Jens Sam Andersen taassumalu, inuttaata oqarnera malillugu, aappassiarisimasaa. Jens Sam Andersenip pasilliutit tunngavissaqannginnerarpai. 

Akisussaaffimmik tigusiumanngitsoq

Jens Sam Andersenip siusinnerusukkut ateq Sam Overgaard atorsimavaa, siullermeerlunilu ujartuiffigineqalinngilaq.

Jens Sam Andersen niuernikkut ingerlatseriaatsit isornartut pillugit ateq Sam Overgaard atorlugu Danmarkimi tusagassiuutinit arlaleriarluni sammineqartarsimavoq.

Taamaappoq aamma aappassiarisimasaa. Helsingør Dagbladimi 2021-mi allaaserisami oqaluttuarineqarpoq, Kronborg Røgerimi sulisut akissarsiassaminnik tigusaqarsimannginnerminnik naammagittaalliuuteqartut, aamma Sam Overgaard akisussaaffimmik tigusiumanngitsoq, suliffeqarfik aappassiaminit pigisarineqarmat. Taassuma oqarasuaat tigusanngilaa imaluunniit allaaserisamut matumunnga atatillugu Sermitsiaq.AG-p saaffiginnissutaanut akissuteqarsimanani. 

Jens Sam Andersen 2017-imi tv-iikkut piviusulersaarummi Svindlerjagtimi Kanal 5-imi aallakaatinneqartumi sammineqarpoq. Aallakaatitami takuneqarsinnaavoq taanna – ateq Sam Overgaard atorlugu – qallunaanik sanasunik Norgemi suliffeqarfinnut ingerlatitseqqittartoq. Namminerlu akiliutinik tigusaqartarsimasoq, sanasut akissarsianik isumaqatigiissutaasunik tigusaqartarsimanngillat.

- Eqqartuussaanngisaannarsimavunga

Svindlerjagt naapertorlugu Sam Overgaardip ikinnerpaamik inuit 17-it 600.000 koruunit sinnilinnik peqquserluffigisimavai. Suliffeqarfiutai - Nordic Crew aamma Nordisk Bemanning – kingorna akiliisinnaajunnaarput.

Apeqqutaavoq Jens Sam Andersen, taama imminut maanna taagortoq, Kalaallit Nunaanni niuernikkut assingusumik ingerlataqalersimanersoq sanasunik aningaasaqarnikkut eqqugaasunik malitseqartumik.

- Eqqartuunneqanngisaannarsimavunga, Jens Sam Andersen aallakaatitamut Svindlerjagtimut oqaaseqaatitut oqarpoq, Sermitsiaq.AG-mit attaveqarfigineqarami. Nunami maani qallunaat sanasut akissarsisinneqarsimannginnerminnik isornartorsiuinerit oqaaseqarfigiumanngilaa oqarasuaallu iliinnarlugu.

Tamanna sioqqullugu Ilulissaniittoq KJ, Jens Sam Andersenip maannakkorpiaq sullitaasa annerpaat ilaat, innersuussutigaa. Taakkuagooq uppernarsarsinnaavaat, Jens Sam Andersen ingerlatseqatigiiffillu qaammatit tamaasa akissarsiassanik tunniussisartut.

Politiinut nalunaarutiginninneq

Sermitsiaq.AG-mit KJ attaveqarfigineqarmat, paasinarsivoq, sanasut marluk sapaatip-akunnerisa marluk matuma siorna pisortamiissimasut akissarsisinneqarsimannginnertillu naammagittaalliuutigalugu.

KJ Sermitsiaq.AG-mut paasissutissiivoq, Jens Sam Andersenimik suleqateqarnertik tamaat maanna unitsikkitsik.

Sermitsiaq.AG-p sanasut pineqartut taakkua aperisimavai, pisoq pillugu politiinut nalunaarutiginnissimanersut.

Arlallit Danmarkiliarsimapput suliartillu unitsiinnarsimallugu, suliffeqarfiit marluk pinngitsaaliissummik atorunnaarsinniarneqarmata, sanasorlu alla Sulisitsisut isumasioqatigeerlugit Jens Sam Andersenimik akornusersuinermik nalunaarutiginninniarnerminik taamaatitsisimalluni uppernarsaatissat amigaataanerat pissutigalugu.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER