Nitter: Ukioq nuannersuni nuanniitsunilu
Nunarsuarmi timmisartortitseqatigiiffiit ingerlaannarsinnaanissartik tamaviaarutigileruttoraat Air Greenlandip pisortaanerata Jacob Nitter Sørennsenip 2020 ukiut ajornersaattut oqaatigaa, aammali ukiutut timmisartuutileqatigiiffimmik siunissamut upalungaarsaasutut oqaatigalugu.
Coronamik nappaalanersuaq Air Greenlandimut nuanniilliortitsisimavoq, timmisartuussinerit taamaatiinnarneqartarnerat angalanissamullu killilersuinerit atuutilersinneqartarnerat ilutigalugu aningaasartuutit ikilisarneqartariaqarsimammata sulisorpaalussuillu soraarsinneqartariaqarsimammata.
- 2020 ataatsikkut ukiut ajornersaralugulu aamma ukiuusimavoq pitsaasoq. Ajornerpaasimavoq Covid-19 pissutigalugu aamma niuernikkut tunngavissat ullormiit ullormut tammakarnerisa kingunipilui sakkortuut pissutigalugit. Akunnittarfeqarnermik angalanermillu suliaqarfimmi sulisuullu ukioq ilungersunarluinnartuusimavoq, aamma ilaatigut suleqatitsialaat inuulluaqqusariaqalersimallugit ilaatigullu sinneruttut sinneruttut immikkut piumasaqarfigisariaqalersimallugit sakkortulluinnarsimavoq, Air Greenlandip pisortaanera, Jacob Nitter Sørensen, Sermitsiaq.AG-mut oqaluttuarpoq.
Tatiginninneq oqaloqatigiinnerlu
Timmisartortitseqatigiiffiup taamaakkaluartoq ajornartoornermit aniguisimanera nuannaarutigaa tamatumanilu Namminersorlutik Oqartussanik pitsaasumik oqaloqateqarsimaneq tikkuarlugu.
- Pissutsit misilinneqarsimanngisaannartut akissutissallu ilisimaneqariinngitsut iserfigileraanni tatiginnilluinnarnissaq oqaloqatigiilluarnissarlu aqutsinissamut aalajangiisuupput, isumaqarpungalu tamanna misigisaasimasoq pitsaasoq ilikkagaqarfiulluartorlu tamatta pigiliussinnaasarput – oqaloqatigiinneq suleqatigiinnerlu siumut aqqutit pitsaanersaraat, Jacob Nitter Sørensen oqarpoq.
Pissutsit taamaakkaluartoq isumalluarneranut isumaqatigiissutit aalajangiisuusut marluk 2020-mi pilersinneqartut pissutaapput: Namminersorlutik Oqartussanut kiffartuussinissamut isumaqatigiissutit nutaat aamma Danmarkip naalagaaffianut upalungaarsimaneq Search and Rescue pillugu isumaqatigiissut nutaaq.
- Isumaqatigiissutit taakkua kingunerisaannik timmisartuuteqarnikkut periusissiatsinnik ingerlariaqqissinnaasimavugut qulimiguullillu pisoqanngortut nutaanik taarserlugit. Taamaattumik ukioq 2020 tassaalerpoq illuatungaatigut ukiorpassuarnik kinguariartitaaffipput tamatumalu peqatigisaanik siunissamut aamma upalungaarsarfipput, pisortaaneq erseqqissaavoq.
Pissutsut nalinginnaasunngornissaat
Naatsorsuutigaa Air Greenlandip niuernikkut ingerlatsinera siusinnerpaamik 2021-p affaani kingullermi nalinginnaasunngortinneqassasoq.
- Killilersuinerit qasukkartinneqarnerannik angalarusussutsillu malunnartumik qaffariaateqarneranik takusaqarsinnaalernissatsinnut minnerpaamik ukiup affaa ingerlassaaq naammattumik amerlassuseqartut akiuussutissalersorneqarsimalernissaannut, pisortaaneq naliliivoq, piffissallu aatsitassanik misissueqqissaariffiusup 2020-mi uninngalluinnapajaarsimasup 2021-mi sunnerneqarsimannginnerunissaa neriuutiginerarlugu.
Air Greenland 2021-mut ikaarsaarialernermi immikkuullarissumik unammilligassaqarpoq, coronamik nappaalanersuaqarneranut attuumassuteqanngitsumik.
- Unammilligassat annersarissavaat qulimiguullit nutaat marluk H225-p aamma H155-ip atuutilersinnissaat. Atortunik nutaanik atuutilersitsiniarneq tamatigut suliassarujussuusarpoq. Biilinik nutaanik pisinerup assigisanngilaa, taamaattumillu sukannersumik aqutsinissaq inuppassuillu pikkorissut qanimut suleqatigiinnissaat pisariaqassaaq, Jacob Nitter Sørensen, sulisut ilorrisimaarnerannik eqqumaarilluni malinnaaviginninniartoq, oqarpoq.
Suliffik toqqissisimanartoq
- Sulisut pikkorissut coronamit sakkortuumik sunnersimaneqarsimasut, aammali allanngornernit annertuunit suliffeqarfitta maanna aqqusaagaanit sunnerneqarsimasut, paarilluarnissaat unammilligassarujussuuvoq. Air Greenland suliffigissallugu toqqissisimanartuujuaannarnissaa pitsaasuunissaalu pingaaruteqarpoq, erseqqissaavoq.