Skip to main content

Nitter: Tiimmisartoqarfiit nutaat atuutilerpata nunami angallassineq ajornerulissaaq

Illoqarfiit pingaarnersaanni timmisartoqarfissaq nutaaq suliaralugu naammassineqarpat, Nuummiut akulikinnerusumik akikinnerusumillu Danmarkiliarsinnaanngussapput. Tamatumali malitsigisaanik nunami angallassineq ajornerulissaaq, Air Greenlandip pisortaa oqarpoq.

- Nuummi Timmisartoqarfiup allilerneqarnera naammassippat, Nuummi innuttaasut sapaatip akunneranut tallimariarluni

 arfineq-marloriarluniluunniit Danmarkiliartoqartarnissaa qilanaarilereersinnaavaat.

Air Greenlandimi pisortaaneq Jacob Nitter Sørensen, Nuummi illoqarfiup ineriartortinneqarnera pillugu Dansk Industri pingasunngormat isumasioqatigiissitsimmat taamatut oqaaseqarpoq.

- Air Greenlandimi siulersuit 2023-mi timmisartunut nutaangajalluinnarnut aningaasaliissuteqarniarlutik aalajangersimapput. Ilaatigut Norsap taartissaanik Airbus A-330-mik nutaamik pisiaqartoqassaaq.

Tiimisartuutileqatigiiffik timmisartumik napparsimasunik angallassisartussamik siusinnerusukkut pisiaqarsimavoq, Jacob Nitter Sørensenillu pingasunngorpat oqaatigaa, qulimiguulinnik ujaasinermut annaassiniarnermullu atugassanik malunnik nutaanik pisisoqarsimasoq.

Bilitsi 2.000 koruuninik akikinnerulissasoq

Pisortaaneq isumaqarpoq, Nuup Københavnillu akornanni bilitsi siunissami 2.000 koruuninik akikinnerulerumaartoq. Tamatuma malitsigisaanik aqqut taanna angallaffiunerulissaaq. Jacob Nitter Sørensenip nassuiaatigaa, Kalaallit Nunaata Danmarkillu akornanni maanna angallattoqarpallaannginneranut, Ilulissani akunnittarfiit  maannakkorpiaq ulikkaaqqajuarnerat pissutaasoq.

Air Greenlandip A-330-nik atuisarnini ingerlatiinnarniarpaa, ilaatigut timmisartup annertunerusumik orserneqarsinnaanera pissutaalluni, timmisartoq allamut miffissarsiortinnani nalunaaquttap akunnerini pingasuni Nuup silaannartaani kaavissinnaanera pissutigalugu. Timmisartut mikinerit aquttui Nuummi sila ajortillugu minutsini 15-iinnarni eqqarsarnissamut piffissaqartarput, Nitter Sørensen, timmisartortartutut nammineq misilittagalik oqarpoq, taassuma ilanngullugu oqaluttuaraa, Nuummi nalinginnaasumik 45 minutsini persersuaartartoq.

-  Aalajangiinermut aamma pingaaruteqarsimavoq, timmisartut angisuut, A330-tut ittut, annertoorujussuarnik useqarsinnaanerat. Tamanna aamma Kalaallit Nunaanni inuiaqatigiinnut iluaqutaassaaq, ilaatigut aalisakkanik nutaarluinnarnik Kalaallit Nunaannit avammut tuniniaasarneq nutaanik periarfissaqalissagami, Jacob Nitter Sørensen oqarpoq.

Jacob Nitter Sørensen aamma isumaqarpoq, Amerikap nunavittaata Europallu akornanni timmisartukkut aqqut ataaseq arlallilluunniit siunissami atuutilersinnaasut, tassa Nuuk aqqusaartarlugu angallattoqalersinnaasoq. Aqqutip taama ittup Kalaallit Nunaat umiarsuarnik takornariartitsisartunut pilerinarnerulersissinnaavaa.

Nunap iluani timmisartuussinerit akisunerusut

- Nunanit allaniit timmisartornerit akikinerulernissaannut sanilliullugu nunap iluani timmisartuussisarnerit akisunerulerlutillu akuttunerulersinnaapput. Unammilligassaq tamanna politikkerit peqatigalugit ukiuni aggersuni aaqqiiffiginiassavarput, Jacob Nitter Sørensen oqarpoq, ilanngullugu oqarluni, aaqqiissutissarsiornermut atatillugu sinersortaatit angalasarnerannut pisortat tapiissuteqartarnerat oqaluuserineqassasoq.

- Norgemi Frankrigimilu sumiiffiit mikinerusut ukiumut 100.000-it inorlugit ilaasoqarfiusartut naalagaaffimmit tapiiffigineqartarput. Tamanna aamma Kalaallit Nunaanni periarfissaasinnaavoq, pisortaaneq ingerlatseqatigiiffimmi piginneqataassutit tamarmik Naalakkersuisunit tiguneqarnerisa kingorna Air Greenlandi inissisimallualersimasoq pillugu isumaqartoq, oqarpoq:

- Aningaasanik isaatitsiniarluta timmisassanngilagut, timmisinnaaniarlutali aningaasanik isaatitsissaagut, eqqarsaasersuut taamatut nipeqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER