Nitter: Qanoq mittarfiup takissuseqarnera apeqqutaanngilaq
Air Greenlandip timmisartuutai eqqarsaatigalugit Qaqortumi mittarfissap 1500 imaluunniit 1199 meteriunissaa timmisartuutileqatigiiffimmut apeqqutaavallaanngilaq. Mittarfik qanorluunniit takitigigaluarpat attaveqaatit pitsaanerulissapput, pisortaaneq erseqqissaavoq.
Polikkerit Qaqortumi timmisartoqarfissaq pillugu inaarutaasumik aalajangiinialerunik arlalinnik eqqarsaatigisassaqarput.
Mittarfiup qanoq takitiginissaa pillugu apeqqutip saqqummiunneqaqqinneranut pissutaavoq, pilersaarutigineqartutut mittarfissap 1500 meterisut takitigisup timmisartoqarfiullu illutassai suliariumannittussarsiuunneqarmata én milliard koruunit sinnerlugit akilimmik neqerooruteqartoqarsimanera, sanaartornissamut 670 millioner koruunit missingersuutigineqarsimagaluartut.
Missingersuusiarineqarsimasut taakku aningaasanut inatsimmisuli immikoortinneqarsimanngillat.
Nal. akunnerini 6-7-ini Københavnimut ingerlasinnaaneq
Mittarfissaq naannerutinneqarpat sanaartornermi aningaasartuutit annikinnerussapput inuaqatigiillu aningaasaqarnerannut annikinnerusumik kinguneqassalluni, Deloittep nalunaarusiaani qanittukkut tamanut saqqummiunneqartumi tamanna atuarneqarsinnaavoq.
Air Greenlandillu isumaa naapertorlugu mittarfiup qanoq takitiginissaa apeqqutaanngilaq.
- Timmisartuussinissamut pilersaarutivut allannguuteqanngillat. Nuummit timmisartorsuarnut mittarfissaq aqqutigalugu Kujataanut angallassisarnissaq pilerinartuutillugu neqeroorutiginiarparput. Mittarfik 1500 meterisut imaluunniit 1199 meterisut takitigingaluarpalluunniit sullitatta, Qaqortumiit Københavnimut nalunaaquttap akunnerini arfinilinniit arfineq-marlunnut ingerlaartarnissartik naatsorsuutigisinnaavaat, Air Greenlandimi pisortaaneq Jabok Nitter Sermitsiaq.AG-mut oqarpoq.
Danmarkimut toqqaannartumik timmisartoqartassanngitsoq
Pisortaanerup erseqqissaassutigaa, suliffeqarfiup timmisartuutai mittarfinnut naatsunut naleqqussagaareersut.
- Nuummi mittarfik ullumikkut 950 meterisut takissuseqarpoq Ilulissanilu mittarfik 845 meterisut takissuseqarluni, taamaammat 1199 meteri ullumikkut suliaqartarnitsinnit killilersuinerunavianngilaq, taanna oqarpoq.
Air Greenlandi inuiaqatigiit aningaasaqarnerannut kinguneqaatissat pillugit nalunaarusiamut aamma ilanngussaqarsimavoq, tassani Jacob Nitterip ilisimatitsissutigaa, Kujataani nutaamik timmisartoqarfeqalerpat, Qaqotumiit Nuummut sapaatip akunneranut timmisartuussisarnerit amerlanerulissasut.
Tassunga atatillugu aamma ilisimtitsissutigaa, Kujataaniit Danmarkimut aasakkut toqqaannartumik timmisartuussisarnerit atorunnaarsinneqassasut.