Nitterip ukiarnissaa isumalluarfigigaa
Corona qaammaterpassuarni silaannakkut angallassinermut ajornartorsiortitsereersoq Air Greenlandip siunissaa qaamanerulerpoq. Takornariarusuttut amerliartorput, Naalakkersuisullu tikinnissamut killilersuutinik atorunnaarsitsinissamik nalunaatueqareersut pissutsit ukiamut pitsaanerulerniartutut isikkoqarput.
Air Greenlandimi pisortaanerup Naalakkersuisut ammaaqqinnissamut pilersaaruteqarnerat nuannaarutigaa, tamatumami malitsigisaanik timmisartuutileqatigiiffimmi piffissami kingullermi ulapputtoqarsimavoq.
- Taamaalilluta timmisartuussisarnerit amerlisinnaanngorpavut akigititavullu nalinginnaasunngorteqqissinnaanngorlugit. Aamma aappaagu ulapaarfiunissaanut maanna pilersaarusiorsinnaanngorpugut, Air Greenlandimi pisortaaneq Jacob Nitter Sermitsiaq.AG-mut oqarpoq.
Maanna ammaaqqittoqarneratigut sapaatip akunneranut tallimariarluni Danmarkimut Danmarkimiillu angallassisoqarsinnaalernikuuvoq, nalinginnaasumik ukiup taamaalinerani sisamariarluni angallassisoqartaraluarpoq.
- Angalarusuttut amerliartornerat malugaarput, taamaammat aallaqqaammut oktobarip qaammataata naanissaanut sapaatip akunneranut immikkut ataasiarluta angallassisarnissaq ingerlapparput, Jacob Nitter oqarpoq.
Ammaaqqinniarneq utaqqinarsimasoq
Taassuma inuiaqatigiinni tuniluuttoqarunnaariartornera nuannaarutiginerarpaa.
- Ammaaqqinnissamut suliniutigineqartut arlallit tuniluuttoqaqqilerneratigut, deltavirusi alallallu pissutigalugit tunuarteqqinneqartartut takusarparput. Kiisami ammaaqqittoqarsinnaalenera nuannerluinnarpoq, coronammi nalaani suliffeqarfimmik ingerlatsiniarneq ajornakusoorsimaqimmat, Jacob Nitter oqarpoq.
Taassuma erseqqissaassutigaa, suliffeqarfiup iluani sulisunut sullitanillu attaveqartarenermut tamanna piumasaqaatitaqartarsimaqisoq.
- Sulisut ilaasussallu malittarisassat allanngortittuarneqartarnerannit sunnerneqartarsimapput, angalarusuttorpassuillu pakatsisarsimallutik. Attaveqaatissallu nutaat qanittukkut atuutilersussat piareersarfigineqarnissaannut maanna suliaqassaagut, Nitter Nuummi, Ilulissani Qaqortumilu timmisartoqarfissat nutaat innersuussutigalugit oqarpoq.
Ulapputilereersimasut
Pisortaanerup oqaluttuaraa, ammaaqqikkiartuaarnerup malitsigisaanik Ilulissani akunnittarfik aggustimut ulikkaarneqareersimasoq.
- Oqartussat inuit akiuussutissalerneqarsimasut nunamut tikissinnaanerannik ammaammata, aggustip qaammataata naalernerani Hotel Arcticimi inissat ulikkaarneqareerput. Takornariarusuttut amerlasimaqaat, taamaammat ukiamut ingerlalluartoqarnissaa naatsorsuutigaarput.
Air Greenlandimi sulisoqarnikkut pissutsit suli pitsaasuusut, pisortaanerup erseqqissaassutigaa.
- Matoqqatitsinerup nalaani sulisussavut amerlanerulaarsimapput. Taamaammat maanna sulisut amerlassusaat ukiaru ukiorulu naatsorsuutigisatsitut ulapinnissatsinnut naapertuupput.
Pingaartumik atlantikoq qulaallugut timmisartuussisarnerit matoqqatitsinerup nalaani kingunerluuteqarsimapput, najugaqavissorpassuimmi nunami maani angalanerusimammata, taamalu nunami angallassisarnerit ingerlaannarsimallutik.
- Aasaru ulapinnerpaaffiulerpat amerlanerusunik atorfinitsitsinissaq matumani pineqarpoq, tassa corona allalluunniit pissutigalugit naatsorsuutiginngisamik pisoqanngippat, Jacob Nitter ilisimatitsivoq.