Nitter: Coronavirusi aarlerinartorsiortitsinerpaavoq

Norgemi timmisartuutileqatigiiffiup Norwegianip martsip qaammataata qiteqqunneraniit juunip qaammataata qiteqqunneranut timmisartuussinissani 3000-it taamaatiinnarsimavai. Tassa piffissami pæineqartumi Norwegianip timmisartuussisarnerata 15 procentiinut naapertuuttut taamaatiinnarneqarsimapput.

Lufthansa sapaatip akunnerani kingullermi allanngortoqarnissaanut pilersaarusorsimavoq, tassa piffissami aalajangersimasumi timmisartuussinissat 25 procentii taamaatiinnarsimavaaat. Air Greenlandimili taamak ajortigisumik inissisimasoqanngilaq.

- Pineqartup (coronavirusip) sunniutai maannamut suli maluginngilavut, pisortaq Jacob Nitter Sørensen oqarpoq.

Aningaasaqarnermut kinguneqaataasinnaasut

Ingerlatseqatigiiffik inniminniinerit ikileriarsimanerannik imaluunniit angalanissamut inniminneriikkanik taamaatitsiinnarsimasunik suli takusaqanngilaq. Pisortalli erseqqissaatigaa, ernumassuteqarneq maannakkorpiaq initoorujussuusoq.

- Aningaasarsiornitsinnut maannakkut aarlerinaateqarnerpaaq tassaavoq coronavirusi. 2020-mi ukiumoortumik angusassatsinnut tamanna qularnanngitsumik sunniuteqassaaq. Uagutsinnuinnaanngitsoq, aammali suliffeqarfinnut angalasartunit orninneqartartunut, soorlu akunnittarfinnut, neriniartarfinnut, pisiniarfinnut takornariartitsisartunullu sunniuteqassaaq, tassa pisoq piaartumik iluarsiartulinngippat, taanna oqarpoq.

Annertuumik kingunerluuteqarsinnaanera pinngitsoortinniarlugu Air Greenlandimit nakkutigeqqissaarneqartariaqarpoq, inniminniisut ikilinissaannut taamaatitsisoqarnissanullu tunngatillugit qanoq ineriartortoqarnera.

- Timmisartuutileqatigiiffittut iliuuserisinnaasarput tassaavoq angallassinissamut pilersaarutitsinnik isumannaallisaanissarput, aallarfissanik taamaatitsiinnarnissarput aningaasartuutinillu annikillisaanissarput. Tamakku ullut tamaasa nalilersortarpavut, Jacob Nitter Sørensen oqarpoq.

Sulisunik annaasaqarsinnaaneq

Tuniluuttorli siaruaatissappat taakku naammannersut qularnarpoq, taanna nassuerpoq.

- Alloriarfissarput tulleq tassaavoq, piffissaq ungasinnerusoq eqqarsaatigalugu sulisunik ikililerinissaq. Ajoraluartumik imaasinnaavoq sulisut aningaasarsiaqartinnagit angerlartinneqartarsinnaasut. Tamanna kissaatiginngilluinnarparput, timmisartuussisarnermili inerlatseqatigiiffiit allat annanniarlutik taamatut iliortut takusareerpavut, Jacob Nitter Sørensen oqarpoq.

SAS-ip marlunngormat nalunaarutigaa, coronamik ajornartorsiuteqarneq pissutigalugu sulisut qaammatini pingasuni 20 procentimik annikinnerusumik aningaasarsisalernissaannik piumaffigisimallutikkit.