Nitter pisiaqarneq pillugu: Ulloq oqaluttuarisaanermi pingaarutilik

Air Greenlandimi pisortaanerup, Jacob Nitter Sørensenip qulimiguulinnik ujaasinermi annaassiniarnermilu atorneqartartussanik marlunnik pisiaqarneq, oqaluttuarisaanermi ulloq timmisartuutileqatigiiffimmut inuiaqatigiinnullu kalaallinut pingaaruteqartutut taavaa

Air Greenlandip qulimiguulinnik, Airbus H225, marlunnik nutaanik pisiaqarnermigut danskit naalagaaffiannut takutippaa, timmisartuutileqatigiiffiup Kalaallit Nunaanni suliffissaqartitsinermik isertitaqarnissamillu qulakkeerisussamik SAR pillugu suliariumannittussarsiuussinermi tullermi ajugaarusunnini.

SAR pillugu maanna isumaqatigiissutaasoq 2020-p naanerani atorunnaassaaq, neqeroorullu nutaaq ukiup affaata tulliata ingerlanerani isumaqatigiissutigineqarsimassasoq naatsorsuutigineqarluni.

- Ulloq oqaluttuarisaanermi pingaaruteqarpoq. Qulimiguuliutitta nutaanngitsut, S-61, taarserneqarnissaat qangalili kissaatigilersimavarput. Maanna qulimiguulinnut nittaattumi taartumilu timmisinnaasunut aningaasaliissuteqarpugut, qulimgiguullit nutaaliaanerpaanik atortullit, Jacob Nitter Sørensen Sermitsiaq.AG-mut oqarpoq.

Naammaginartumik akillit

Qulimiguullit marluk atornikut pisiarineqarput, taakku nalunaaquttap akunnerisa 25-t 240-llu akornanni taamaallaat timmisimanerat pissutigalugu nutaatut tuniniarneqarsimapput. Piginnittuusimasup qulimiguullit atuuffissarsiuuttarneri ajornartorsiutigisimavaa, taamaammat naammaginarluinnartumik akilerlugit pisiarineqarput.

- To hundrede millioner koruunit missaannik akeqarput, Jacob Nitter Sørensen paasissutissiivoq.

Air Greenland uuliasiortunik kiffartuussinermigut isertaqartarnissamik naatsorsuuteqarluni, 2012-imi qulimiguullit maanna pisiarineqartut assigannik marlunnik pisiaqarsimavoq. Uuliasiortunik kiffartuusserusunneq pivisunngunngitsoorsimavoq, timmisartuutileqatigiiffiullu qulimiguullit tuniniaqqittariaqarsimavai. Qulimiguullit pineqartut taamanikkut pisiarineqaramik 400 millioner koruunit missaannik akeqarput, qulimiguullillu taakkutut ittut tamatuma kingorna teknikkikkut pitsanngorsaaffigineqarsimapput.

Naalagaaffiup SAS-illu Air Greenlandimi piginneqataassutaannik pisiaqaqqammerlusi qulimiguulinnik pisiaqarnissamut akissaqarpisi?

- Pisiaqarneq, Naalagaaffiup SAS-illu piginneqataassutaannik pisiaqarnermut atatillugu periusissatut pilersaarusiamut ilaatinnqarpoq. Akigititaq, timmisartuutitsinnik nutarterinitsinnut tunngatillugu allannguinissamik pilersaaruteqarnitsinnut atatillugu killiliussimasatta iluaniippoq, Jacob Nitter Sørensen aqutsisunut suleqataalluarsimasoq, naggataatigullu qulimiguulinnik pisisoqarnissaanik aalajangiisimasoq ilisimatitsivoq.

Pisiaqarneq Air Greenlandimi kaagillerluni nalliuttorsiutigineqassava?

- Naamik. Ullumikkuunngitsoq. SAR pillugu isumaqatigiissuteqarnissatsinnut tamanna utaqqisinniarparput. Nanormi suli pisaritinnagu amia tunineqareersinnaanngilaq, pisortaaneq oqarpoq.

Qulimiguullit suli Polenimiittut

SAR-imut tunngatillugu isumaqatigiissutissaq – naatsorsuutigisamut sanilliullugu – pissarsiarinngikkutsigut, qulimiguullit pineqartut tuniniaqqinneqarnissaat pilersaarutaavoq.

- Naammaginartorujussuarmik akilerlugit pisiarivavut, uangalu isumanga malillugu annaasaqaatigissagutsigit, annikitsuaraannarmik annaasaqaatigisinnaavavut, Jacob Nitter Sørensen oqarpoq.

Qulimiguullit Polenimiipput, 2020-milu juunip qaammataani tunniunneqartussaallutik.

- Taamanikkussamut ukiup affaanik piffissaqarpugut, timmisartortartut, mekanikerit sulisullu allat atortunik nutaanik isumaginninnissamut ilinniartinneqarnissaannut. Soorunami SAR pillugu isumaqatigiissuteqarsimagutta aatsaat, pisortaaneq ilisimatitsivoq.

Powered by Labrador CMS