Nittartakkani influenceri suliffeqarfiup ammarneqarnera nuannaarutigigaa.
Aka Niviâna Mørch Pedersen nittartakkani attaveqatigiiffiusuni silap allanngoriartornera, inuit pisinnaatitaaffii inuusuttullu inuunermi atugarissaarnissaat pillugu nittarsaassisuuvoq.
Nittartakkani attaveqatigiiffiusuni malinnaasunut hunnorujulikkaanut imaluunniit tusintilikkaanut neqerooruteqarneq isummanilluunniit nittarsaassineq periarfissatsialaavoq.
Suliffeqarfillu Look North, nunatsinni nittartakkatigut influenceriusunik suleqateqarnissamut neqeroornera atorluarlugu, influencerit oqariartuutiminnik saqqummiussisinnaanerat ajornannginnerulersinnaavoq.
Silap pissusaa atugarissaarnerlu
Aka Niviâna Mørch Pedersen Instagramimi influenceritut ingerlasoq taama isumaqarpoq.
Influencer tassaasinnaavoq tusaamasaq imaluunniit amerlasuunit ilisarisimaneqarluartoq, oqariartuutiminik malinnaasuminut siammarterisartoq.
Aka Niviâna Mørch Pedersen silap pissusaata allanngoriartornera, inuit pisinnaatitaaffii imminullu toquttarnerup akiorneqarnerunissaa pillugu attaveqatigiittarfitsigut oqariartuuteqakkajuttarpoq.
- Nittartakkakkut attaveqatigiittarfiit isummanik siammaanissamut periarfissatsialaapput. Isumaqarpungalu pitsaalluinnartuusoq influencerinut sullissisumik nunatsinni suliffeqarfeqalermat, nunatsinnik ilisimasaqarluartumik suleqateqarsinnaaleratta oqariartuutit avammut apuunniarnerini, Aka Niviâna Mørch Pedersen Sermitsiaq.AG-mut oqarpoq.
Sullissisoqarneq oqinnerulersitsissaaq
Influencerit oqariartuutigisaminnik siammaaniartillutik suliffeqarfiit ilaanni suleqatigisinnaasarpaat, taamaasillutik aamma suliffeqarfik suleqatigisartik nittarsaassinnaasarlugu.
Aka Niviâna Mørch Pedersenip tikkuarpaa suliffeqarfinnik allanik suleqateqarnissamut attaveqaasiorsinnaasumik suliffeqarfeqalerneq, soorlu Look Northitut ittumik, nittartakkami attaveqatigiiffiusumi imarisassanik suliaqarnermik oqilisaassisinnaasoq.
- Nittartakkami influenceritut sulinermi assiliinerinnaanngilaq allannerinnaananilu. Malinnaasumma soqutigisaat aallaavigalugit saqqummiussisarpunga, taamaattumik imarisaanik suliaqarneq piffissartornarsinnaasarpoq.
- Suliffeqarfik atulersoq uannut pilersaarusiuussisinnaavoq suleqatigiligassannullu attaveqaataasinnaalluni, uannut tamanna oqilisaataassaaq. Taamaasillunga malinnaasunnut saqqummiussassakka, malinnaasunnillu attaveqaqatiginnittarnikka piffissaqarfiginerulissavakka, Aka Niviâna Mørch Pedersen oqaluttuarpoq.