Nittartakkami nutaami inooriaatsip nassatarisaanik nappaatit paasissutissiissutigineqarput
Inuunerissaavik Steno nittartagartaarpoq, tassani inooriaatsip nassatarisaanik nappaatit ilaat pillugit innuttaasut paasissutissanik tunineqartassapput.
Sukkornermik nappaateqarneq, KOL aallu naqitsinera qaffasissoq.
Inooriaatsip nassatarisaanik nappaatit taakku Kalaallit Nunaanni inuttaasut Inuunerissaaviup Stenop nittartagartaavatigut paasisaqarfigisinnaavaat.
Tassani aamma peqqinnarnerusumik inuuneqarnissamut, inooriaatsimik allannguinissamut,
pujortarunnaarniarnermi ikiorneqarnissamut, timimik atuinerulernissamut peqqinnarnerusunillu nerisalernissamut isumassarsiorfissanik paasissutissaqarpoq.
- Nittartakkap inunnut inooriaatsimut attuumassutilinnik nappaateqartunut, nappaatit pillugit nalinginnaasunik paasissutissiivittut; napparsimasunut ilitsersuutit, quppersakkat, video-it kiisalu uumassusilerlugit filmiliat atorlugit ilisimasaqarfiunissaa anguniagaavoq.
Taamatut oqarpoq Inuunerissaavimmi Stenomi nakorsatut pisortaasoq Michael Lynge Pedersen tusagassiorfitsigut nalunaaruteqarnermi.
Iluaqutaallunilu isumassarsiorfiusassasoq
Ukiut tulliuttut marluk ingerlaneranni inooriaatsimut attuumassuteqartumik nappaatilinnut paasisutissanik annertunerusunik, nittartakkami pissarsiarineqarsinaalersussanik, inerisaasoqassaaq. Atortussat, inooriaatsimut attuumassutilinnik nappaateqartut peqqinnissakkullu sullissisut kissaataat aallaavigalugit inerisarneqassapput.
- Nittartakkap nunatsinni innuttaasunut amerlasuunut iluaqutaajumaarnissaa isumassasiorfigineqarumaarnissaalu nappaatillu pillugit ilisimasanik - pingaartumillu piffissaagallartillugu pitsaaliuinissamut nakorsarneqarnissamullu periarfissarpassuarnik siammartereqataanissaa neriuutigaarput, Inuunerissaavimmi nakorsatut pisortaasoq oqarpoq.
Nittartagaq kalaallisut danskisullu paasissutissanik imaqarpoq. Imarisaasa ilaat amma tuluttuujussapput.