Nittartagaq paasissutissiisarfiusoq nutarterneqarsimasoq
Danmarkimi kalaallit illuisa nittartagartik, kalaallinut Danmarkimut nuunnissamik eqqarsaateqartunut paasissutissiisarfitsik nutartersimavaat.
Kalaallit Nunaanniit Danmarkimut nuutsinnak Danmarkimi aaqqissuussaaneq pissutsillu ilisimakkit. Kalaallit Illuisa nittartagaat, KendDanmark.dk taamak naatsigisumik allaaserineqarsinnaavoq.
Nittartagaq danskisut kalaallisullu nutarterneqaqqammerpoq, innuttaasut tassani Kalaallit Nunaanniit Danmarkimut nuunniartut siunnersuutinik ilitsersuutinillu atuagaqarsinnaapput.
- Nittartagaq ukiualunni atuutereerpoq, maannalu oqaatsit marluk atorlugit saqqummiisinnaalernerput nuannaarutigaarput. Neriuutigilluinnarparput, inuit Danmarkimut nuunnissamik eqqarsaateqartut unikaallallutik ilisimasassaminnik misissuisarnissaat, Københavnmi Kalaallit Illuanni pisortaq Leise Johnsen tusagassiorfinnut nalunaaruteqanermi oqarpoq.
Nittartagaq 2017-imi siullermik atuutsinneqalerpoq.
Kulturi allarluinnaasoq
Kalaallit Nunaanni innuttaasut Danmarkimut nuukkaagamik pissutsit allarluinnaasut misigisarpaat. Kalaallit Nunaanut danskinik naalagaaffeqateqaraluartoq, Danmarkimi aaqqissuussaaneq pissutsillu kiisalu kulturi allaalluinnartuupput. Nittartakkatigut kalaallit Danmarkimut nuunneranni ilisimasassarpassuit pillugit ilisimatinneqartarput.
NemID/MitID, utoqqalinrsiat, qimuttuitsunut bilitsit inuttullu attaveqaatit tassani paasisaqarfigineqarsinnaapput.
- Naatsorsuutigisamit Danmarkimut nuunnermi ajornartorsiornerusoqarsinnaavoq, pisortat aqqissuussaaneranni suliffeqarfinnilu innuttaasunut allarluinnarnik piumasaqaateqartoqarlunilu naatsorsuutiginnittoqartarmat. KendDanmark.dk aqqutigalugu Danmarkimi pisortat immaqa ilisimasaqarfiginngisatit pillugit paasissutissarpassuarnik pissarsisinnaavutit, Aarhusimi Kalaallit Illuanni pisortaq Tanja Nielsen oqarpoq.
Kalaallit 16.000-it
Kalaallit Illuisa kalaallit Danmarkimiittut 16.000-it missaanniittut sullittarpaat. Kalaallit Illuinit misigineqakkajuttarpoq, inuppassuit Danmarkimut nuunnissap ajornanngitsuaraaneranik isumaqartartut. Nuunnermili naatsorsuutigisimanngisamik unammilligassarpassuaqartoqalertarpoq.
KendDanmark.dk Danmarkimi Kalaallit Illui suleqatigalugit suliarineqarsimavoq.