Nittartagaq nutaaq: Assit pisoqqat allagaatitoqqallu

Nunatta Katersugaasivia Allagaateqarfialu nutaamik periaaseqarluni digitaliseriinikkut oqaluttuarisaanermit assinik allagaatinillu saqqummiisalerpoq. Tassami nittartagaq qangagooq.gl saqqummiunneqaqqammerpoq.

Nittartakkap saqqaata assilinera.

Nittartakkami paasissutissat takusassallu saqqummersinneqartut ukiorpassuit ingerlanerini nalunaarsueriaatsit, digitaliseriinermilu periutsit suliniutillu iluaqutigalugit piviusunngortinneqarput. Nunatta Katersugaasivia Allagaateqarfialu tusagassiuutinut nalunaarummi taama ilisimatitsivoq.

- Paasissutissat ataatsimoortunngorlugit katersorneqarput, tassanilu assit 18.000-it allagaatillu 450-it missaat januar 2019-imi takuneqarsinnaalersut pigineqalerput. Ingerlaavartumillu Qangagooq.gl immersorneqalissaaq, taamaasillunilu NKA-p katersugaatai digitaliserikkat tamarmik tassani iserfigineqarsinnaalissapput, katersugaasivik allappoq.

Assit katersugaatit arlallit digitalisererneqareerput, soorlu kalaallit assiliisuini siullerpaap John Møllerip assilisai 3000-it missaanniittut 1890-ip missaaniit 1922-ip tungaanut assilisat. Aammattaaq ukiut nutaanerit nalaanniit assilisat, taakkualu ilaat NKA-p ukiut ingerlanerini itsarnisarsiuut paasiniaallutik sulineraniit assaasarneriniillu assilisaapput.

Qangagooq.gl-imi allagaatitoqqat takuneqarsinnaasut tassaapput Kalaallit Nunaanni politikkimi oqartussaaqataaffinni kalaallillu peqataaffigisaanni qinigaaffinnilu siullerni aaqqissuussinerni allagaatit, tassa Paarsisut, kommunerådillu 1860-ip missaaniit 1939-ip tungaanut allagaataaneersut, - tamarmillu kalaallisut allagaapput. Aamma Avannaani inuit nalunaarsorneqarneri (mandtalslister) 1790-imiit 1890 ilanngullugu Qangagooq.gl-mi misissorneqarsinnaapput.

- Allagaatitoqqat digitalisererneqarneri aningaasaateqarfinnit 2017-imi ajunngisaarfigineqarnernerup kingunerisaanik piviusunngorsinnaalerput – aningaasaateqarfiit 15. Junifonden aamma Dronning Margrethe og Prins Henriks Fondip scannerip immikkut ittup pisiarinera, ikkussuunnera atuutsilerneralu tapiiffigivaat aammalu digitalimik katalogip pilersinnera, NKA taama allappoq.

Aningaasaateqafiit taamasillutik siunissami NKA-mi digitaliseriinerup pitsaanerpaanik atortoqarluni ingerlanneqarnissaa piviusunngortippaat.

Powered by Labrador CMS