Nittaalartalimmik anorersuartoqarsimanera pissutigalugu coronavirusimut misiliutinut akissutissat kinguaattoortut

Nunatta nakorsaanera Henrik L. Hansen:

- Misissugassat ullumi akissutisisimannginnatsigit, ullumi eqqissisimakannerpugut. Coronavirusimik tunillatsissimallutik napparsimasut arlaannaalluunniit aamma napparsimmavimmut unitsinneqarsimanngilaq. Maannamut Nuummi pissutsit ineriartornerat malinnaavigilluarparput, taamatullu misissugassat amerlanerpaartaat tamaani tigusarlugit. Sinerissamili misissugassanik amerlangaatsiartunik aamma tigusisimavugut, sinerissami tunillatsittoqarsimassappat ingerlaannaq paasinissaa siunertaralugu.

- Ilulissani misissugassat 34-t. Aasianni 24-t, Sisimiuni 22-t. Misissugassat Qaanaameersut Tasiilameersullu suli amigaatigaagut.

- Timmisartoq maanna aallareerpoq, Savalimmiullu missaanniissalluni. Misissugassat akissutissaat aqagu paasisaqarfigissavagut, nunatta nakorsaanera oqarpoq.

Suli festertoqartarpoq

Politimester Bjørn Tegner Bay:

- Tallimanngornerit arfininngornerillu nalinginnaasut assigalugit unnuaq suliassat nikinngillat. Tamanna isumaqarpoq suliassaqangaatsiarsimasugut. Ippassaq nalunaaqutaq 16.00-miit maannamut angerlarsimaffimmi eqqissiviilliortitsisut ornissimasagut 23-iupput. Taakkunannga arfinillit Nuummiillutik. Nuummi pisut natsorsuititsipput coronaviruseqartoqalinnginneranituulli suli imigassartortoqartigisartoq. Eqqarsarluaqqaartarnissamik kaammattuiumavunga. Inuit akunnerminni qanillivallaarpata tunillaassuuttoqalersinnaavoq. Politiit ambulancenilu sulisut aamma ulorianartorsiortinneqalissapput.

Angalasut ingerlaqqinneq ajulersimasut

Karl Frederik Danielsen ilisimatitsivoq angalasussat 70-it missaanniittut apuuffissaminnut apuunneq ajulersut apuunnissaat sulissutigineqartoq. Siulliit tikittareerput, sinnerilu tullinnguullutik.

- Qasserpiaaneri oqaatigiuminaappoq, takusinnaasakkali malillugit inuit 41-t suli tikiffissaminnut apuutinngillat. 32-t siulliit ullumi angalassapput, sinnerilu qulingiluat aqagu sapaammi angalassallutik, tassanili sila aamma apeqqutaassaaq, Danielsen oqarpoq.

Angalanissamut qinnuteqarit

Taassuma erseqqissaatigaa Naalakkersuisut nittartagaanni “pisariaqartumik” angalanissamut qinnuteqartoqarsinnaalersoq.

Qanoq inissisimanermi qinnuteqartoqarsinnaanera pillugu uani atuarit.

Immikkut aningaasartuutit

Nunatta nakorsaanera ilisimatitsivoq Danmarkimut ullut tamaasa timmisartuussineq akisungaatsisartoq. Misissuineq ataaseq Peqqinnissaqarfimmut 4.500 koruuninik akeqarpoq.

- Sulinngiffeqarluta angalasinnaavugut?

- Nunarsuup sinnerani pisoqangaatsiarsimavoq, pissutsillu ullut tamaasa allanngorarput. Kalaallit Nunaanni sulissutigaarput tunillaassuunnerup nunatsinnut isinnginnissaa. Nunarsuup sinnerani sumiiffiit ikittuinnaat allat taamaaliornissamut periarfissaqarput. Kisianni Kalaallit Nunaata avammut matoqqatiinnarnissaanut piffissaq soorunami killeqartariaqarpoq. Allanut mattukkallarnermit ammaqqinnissamut pilersaarut suli inissinngilaq, nunarsuup sinnerani sapaatip akunnerni tulliuttuni pissutsit apeqqutaalluinnarmata. Qaammatini tullerni qanoq pisoqarumaarnersoq maanna akineqarsinnaanngikkallarpoq, Henrik L. Hansen oqarpoq.

Tunillatseqqinneq

- Tunillatsissimallutik napparsimareersut tunillatseqqissinnaanersut pillugit suli qulakkeerisoqanngilaq. Virusit tamarmik assigiinngitsuusarput assigiinngitsunillu piginnaaneqartarlutik, taamaattumik apeqqut taanna maanna akineqarsinnaanngilaq. Nalunngilarput virusimik tunillatsereernermi tunillatseqqissinnaajunnaartoqartartoq, siunissarli ungasinnerusoq eqqarsaatigalugu ilumut tunillatseqqinngivittoqarsinnaanersoq pillugu ilisimasaqanngilagut, nunatta nakorsaanera oqarpoq.

Festernissamut inerteqqussut

- Qallunaat oqartussaasui assigalugit akulerussinnaanerugaluarutta inerteqqutit malinneqarnissaannut periarfissaqarnerussagaluarpugut. Tamanna isumaqassaaq innersuussutit sakkortuut inatsisinngornissaat. Inatsisinngortariaqarput, Kalaallit Nunaanni atortissinnaaniassagatsigit. Katersuunnernut inerteqqussut angalanissamullu inerteqqussut politiinit ullumi atuutsinneqarsinnaasutuaapput, politimester Bjørn Tegner Bay oqarpoq.