Nissi-Olsennikkut decemberimi malinnaaffigikkit
Angerdla Kielsen Olsen, Heina Kielsen Olsen, Nikku Olsen aamma Georg Olsen nissi-Olsenikkut pillugit ammartakkamik TV-kkut isiginnaagassamik suliaqaleruttorput.
Meeqqat inersimasullu 1. decemberip aallaqqaataanut qilanaarutissaqarput.
Nissi-Olsenikkummi juulimaamik ujaasissapput. Tamannalu meeqqat TV-kkut malinnaavigisinnaavaat.
Angerdla Kielsen Olsen, Heina Kielsen Olsen, Nikku Olsen aamma Georg Olsen ammartakkamik TV-kkut isiginnaagassamut immiussillutillu katiterinermik ulluni makkunani ulapputeqarput. Ammartagaq TV-kkut decemberimi aallakaatinneqassaaq.
Arngerdla Kielsen Olsen Sermitsiaq.AG-mut oqaluttuarpoq Nikku Olsenilu siorna isumassarsisimallutik. Kujataanimi meeqqanut juullerpalaartitsinerit corona pissutigalugu unitsinneqarsimasut paasisimavaat.
- Taamani eqqarsaratta juullerpalaarneq soorunami meeqqanut malunnartinneqartariaqartoq. Taava isiginnaartitsissummik suliaqarpugut. Nissi-Olsennikkut juulimaamik ujaasitittussanngorlugit. Isiginnaartitsissut Narsami, Nanortalimmi Qaqortumilu katillugit 16-eriarluni isiginnaartitsissutigaarput, Angerdla Kielsen Olsen oqaluttuarpoq.
Ukioq manna isiginnaartitsissut TV-kkut isiginnaagassianngortillugu allanneqarpoq, immiussinerillu maanna ingerlallualereerlutik.
Nissit qiimasut
Nissiaqqat pingasut decemberimi pingaarnertut malinnaavigineqarsinnaapput.
- Nissi O qiimasuuvoq, uisakajaartoq, siulliuniaannavissoq, Angerdla Kielsen Olsen oqaluttuarpoq.
- Nissi Olse niviarsiaraavoq illarumatooq qinngasaariumatoorlu.
- Nisse Olsen naalagaavoq, naalagaarusuttoq, susoqassagaangallu akisussaarusuttartoq. Taassuma suna tamaat nalunnginniakujuttarpaa, oqarpoq.
Uummannami, Ilulissani, Sisimiuni, Narsami, Qaqortumi Narsarsuarmilu kiisalu savaatilinni immiussinerit ingerlanneqarsimapput.
Suliaqartummi kissaatigaat meeqqat illoqarfitsik nunaqarfitsilluunniit ammartakkami ilisarisinnaajumaaraat. Angerdla Kielsen Olsen oqaluttuarpoq avannaani immiussinerit ullormik ataatsimik sioqqutsillugit nittaattarsimammat aputissaaleqisimanatik.
TV-kkut ammartagaq Nissi Olsenikkut Namminersorlutik Oqartussanit kulturikkut aningaasaliissutinit, NunaFondenimit, Kommune Kujallermit, Qeqqata Kommunianit Avannaata Kommunianiillu aningaasalerneqarsimavoq, kiisalu illoqarfinni suliffeqarfinnit aamma tapiissuteqartoqartarluni.