Skip to main content

Nipisattassiisutit pillugit suliaq: Demokraatit Kielsen sunianngilaat

Demokraatit siulittaasuat oqarpoq, naalakkersuisooqataasut tapersersuinissaannut tunngatillugu Kielsen ernumassuteqanissamut tunngavissaqanngitsoq. Kielsen taamaalilluni, suliamut Kukkunersiuinermut Ataatsimiititaliap Kielsenip nipisattassiissuteqarnermi iliuuserisimasaanut sakkortuumik oqaaseqaateqarneranik isornartorsiuineranillu inerneqartumut tunngatillugu kinguneqartitsisoqarsinnaaneranut ernumassutissaqanngilaq

Naalakkersuisut Siulittaasuata Kim Kielsenip Naalakkersuisut nipisattassiissutit pillugit suliaqarneranni suliamut attuumassuteqarnera pillugu Kukkunersiuinermut Ataatsimiititaliap nalunaarusiaa tusaatissatut tigusimavaa.

Tamanna Sermitsiaq.AG-mut, suliaq pillugu siulittaasumik arlaleriarluni apersuerusuttarsimagaluartumut, allakkatigut akissuteqarnermini ilisimatitsissutigaa.

Oqaluttuarlu taanna immaqa tamaanga naaneqarsinnaavoq. Partiimi naalakkersuisooqataasoq, Demokraatit, siulittaasumik tunuartitsinissamik siunertaqanngilaq, naak suliamik isumaginnisimaneq tamatumalu kingorna Inatsisartut Ataatsimiititaliaanut paasissutissanik tunniussisoqartarsimannginnera pillugit Kukkunersiuinermut Ataatsimiititaliaq sakkortuumik isornartorsiuigaluartoq.

Nielsen kukkussuteqartoq


Demokraatit siulittaasuata Jens-Frederik Nielsenip KNR-imut oqaatigisimavaa, partii isiginngitsuusaarnianngitsoq. Peqatigitilluguli oqaatigalugu, Demokraatinit nipisattassiissutit pillugit Kukkunersiuinermut Ataatsimiititaliap nalunaarusiaa tusaatissatut tigusimagaat.

- Inatsisinik unioqqutitsisoqarsimasuuppat allatut nipeqassagaluartoq, taanna oqarsimavoq.

Kukkunersiuinermut Ataatsimiititaliaq Kielsen attuumassuteqarpallaarsimanngitsutut, taamalu attuumassuteqarpallaarneq pillugu inatsimmik unioqqutitsisoqarsimannginneranik inerniliisimasoq pillugu Jens-Frederik Nielsenip oqaaseqarnera eqqortuunngilaq.

Ataatsimiititaliaammi inatsimmik unioqqutitsisoqarsimanersoq inerniliissalluni suliassarinngilaa. Paarlattuanik ataatsimiititaliap suliaq misissortussaallugulu saqqummiuttusaavaa, Inatsisartut pisuussuteqarsimaneq pillugu kinguneqartitsisoqarsinnaaneranillu isummertussanngorlugit.

Inatsisartuni amerlanerussuteqartut isumaqarpata, Kielsen suliamut attuumassuteqarpallaarsimasoq inatsimmulluunniit akerliusumik iliuuseqarsimasoq, siulittaasoq tunuartinniarlugu tatiginninnginnermik taasisitsisoqarsinnaavoq.

Sermitsiaq.AG-mit Jens-Frederik Nielsen oqaaseqartinniarneqarsimagaluarpoq, taannali oqaaseqarumasimanngilaq.

Jens-Frederik Nielsenip KNR-imut oqaatigisai naapertorlugit, Kielsen atuuffimmini ataannarniarpasippoq. Naalakkersuisooqatigiit ataatsimuussappata, amerlanerussuteqartut tatiginninnginnermik taasitisisoqarnissaanut suli akerliusinnaapput.

Naalakkersuisooqatigiit amerlanerussuteqarnissaq qulakkiissagaat

Apeqqutaalersorli tassaavoq, Kielsenip tunuliaqutaasa siulittaasortik suli tapersersussaneraat. Kukkunersiuinermut Ataatsimiititaliami ilaasortat Siumumi, Nunatta Qitornaanni Demokraatinilu ilaasortaasut nalunaarusiamut atsioqataasimapput, ilisimasallit naapertorlugit ataatsimiititaliap atuunnerani aatsaat taamak sakkortutigisumik isornartorsiuisoqarpoq. Taakku tatiginninnginnermik taasititsinermi Naalakkersuisut Siulittaasuata atuuffimminiiginnarnissaanik qulakkeerinninniarnersut ilisimaneqanngilaq.

Kim Kielsenip allakkatigut akissuteqarnermini erseqqissaatigerusussimavaa, nipisattassiissutit suliarneqarnerannut atatillugu attuumassuteqarpallaarsinnaaneq eqqumaffigineqarsimasoq.

- Naalakkersuisut suliamik suliaqarnerannut atatillugu Naalakkersuisut Siulittaasuata peqataanini suliamut attuumassuteqannginnera nammineerluni nalilersimavaa.

Tassa Kielsen nammineerluni isumaqarpoq suliamut attuumassuteqarpallaarsimanani, immaqalu taamaammat pisassiissutissat qaffanneqarnissaat akuersissutigineqalermat nalunaaruteqartussaaneq eqqumaffigisimanngilaa.

- Naalakkersuisut Siulittaasuata Kukkunersiuinermut Ataatsimiitialiamut ajuusaarutigalugu oqaatigisimavaa, suliamik Naalakkersuisut suliaqarnerannut peqataagami nalunaaruteqartussaaneq eqqumaffigisimannginnamiuk. Tamanna aamma Kukkunersiuinermut Ataatsimiititalip nalunaarusiaani allassimasoq, Kim Kielsenip akissuteqarernermi allappoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER