Nipisattassiissutit pillugit suliaq: Kielsen maanna qanoq iliussava?
Kukkunersiuinermut Ataatsimiititaliaq siusinnerusukkut marloriarluni sakkortuumik isornartorsiuisimavoq, tassa nipisattassiissutit pillugit suliami maanna tunniussimasaminni sakkortutigisunik. Isornartorsiuisimanerit marluk kingunerannik naalakkersuisut atuuffimminnit tunuarsimapput.
Eqqartuussissuserisoq misissuereersoq aamma Kukkunersiuinermut Ataatsimiititaliap nalunaarusiani tunniutereeraa Naalakkersuisut Siulittaasuat Kim Kielsen suli oqaaseqanngilaq. Sermitsiaq.AG-p Kukkunersiuinermut Ataatsimiititaliap nalunaarusiaanut tunngatillugu oqaaseqartinniarsimagaluarpaa - iluatsinngitsumilli.
Taamaammat Kielsenip isornartorsiuinermut qanoq isumaqarnera suli nalornissutigineqarpoq.
- Ataaserli qularnanngilaq. Tassa Kim Kielsen Kukkunersiuinermut Ataatsimiititaliap nalunaarusiaanut tunngatillugu isummaminik saqqummiussisariaqalerpoq. Tamanna nuannarinngikkaluarpaguluunniit, suliaq pineqartoq innuttaasunit eqqumaffigineqarluarluni sivisuumik sammineqarsimammat, AG-mi aaqqissuisuuneq Christian Schultz-Lorentzen nunatsinni politikkimut ukiorpassuarni malinnaasimasoq oqarpoq.
Naalakkersuisut marluk atuuffiannik naleqarsimasoq
Kukkunersiuinermut Ataatsimiititaliaq nipisattassiissutit pillugit suliami Kim Kielsenimut sakkortuumik isornartorsiunertut sakkortugisumik marloriarluni isornartorsiuisimavoq.
Siullermik naalakkersuisunut siulittaasuusimasoq Aleqa Hammond, ukiumi ataatsimi Namminersorlutik Oqartussat karsiannit nammineq atugassaminik 106.363,27 koruuninik atornerluisimanera pillugu isornartorsiorneqarsimavoq.
Tullissaanik isornartorsiuisoqarsimavoq, inuup peqqissutsimut, isumaginninnermut inatsisinillu atuutsitsinermut naalakkersuisuusimasumut Doris J. Jensenimut atassuteqartup, taamanikkut naalakkersuisuusup benziinarsiutissatut kortia atorlugu umiatsiaminik immiisimasoq misissuinerup takutimmagu.
Pisuni taakkunani marlunni politikkerit atuuffimminnit taamanikkut tunuarput.
Kielsenip nipisattassiissutinut tunngatillugit iliuuserisimasaa kinguneqassanersoq suli nalunarpoq. Kielsen Doris J. Jensenitut Aleqa Hammonditullu nammineerluni tunuanngippat, Inatsisartut susoqassanersoq aalajangiiffigisassaraat. Tamanna uparuaanermiit Inatsisartuni amerlanerussuteqartunit tatiginninnginnermik taasinermut inerneqarsinnaavoq, tassa Naalakkersuisut Siulittaasuat tunuarnissamut pinngitsaalineqarsinnaalluni.
Tatiginninnginnermik taasititsinerit arlallit anigorsimagai
Kielsenilli naalakkersuisooqatigiissitaasa tatiginninnginnermik taasititsisarsimanerit, amerlanerussuteqalaartut tatiginninnginnermut akerliusarsimanerat pissutigalugu anigortarsimavai.
Aalisarnermut Piniarnermullu Naaalakkersuisoq Jens Immanuelsen marloriarluni tatigineqarunnaarsimavoq, ataatsimiititaliaq atuuffianut attuumassuteqartoq februaarip maajillu qaammataanni sulinera ataatsimiititaliamullu ilisimatitsissuteqartarnera pillugit isornartorsiuimmat.
Isornartorsiuinerit taakku marluk Naalakkersuisumut tatiginninnginnermik taasititsinermik kinguneqarsimapput, naalakkesuisorlu Inatsisartuni amerlanerussuteqalaartunit marloriarluni annaanneqarsimalluni.
Siorna novembarip qaammataani Kielsen Partii Naleqqap siulittaasuanit Hans Enoksenimit tatigineqarunnaarpoq. Enoksen taamanikkut isumaqarami Naalakkersuisut innuttaasut aningaasaataasa annersaannik atuisimasut innuttaasullu ulluinnarni atugaannik ajorseriartitsisimasut, aamma naalakkersuinikkut matoqqasumik ingerlatsisoqarnera pissutigalugu.
Aamma tassani Inasisartuni amerlanerussuteqartut tapersersuinerisigut Kielsen Naalakkersusut Siulittaasuattut atuutiinnarpoq.
Periarfissaq allarluinnaq tassaasinnaavoq, Kielsenip Inatsiartuni tapersersorneqarnini annikillisimasoriguniuk qinersinissamik nalunaaruteqarsinnaanera.