Nipisattassiissutit pillugit oqallinneq quianaannarpoq
Kim Kielsenip nipisattassiinermi suliamut qanippallaarsimasinnaanera Inatsisartuni ilaasortat maanna oqaluuseraat. Oqaluuserisassani immikkoortoq 71 pineqarpoq. Naalakkersuisoqatigiilli illuatungiliuttullu suliamik paasinninnerat assigiinngilluinnarput.
Kukkunersiuinermut ataatsimiititaliap misissuinera tunngavigalugu Inatsisartuni oqallinneq aallartimmat, oqallinnermi pineqartoq, Kim Kielsen peqataanngilaq. Immikkoortup oqaluuserineqarnerani akunnerup kuartia qaangiuttoq aatsaat peqataalerpoq.
Siumut sinnerlugu oqaaseqartartoq Karl Kristian Kruse oqallinneq aallarnerlugu oqaaseqarpoq inatsit ersarluppallaarmat allanngortinneqartariaqartoq. Aamma oqaatigaa kukkunersiuinermut ataatsimiititaliap misissuititsinera tamanut saqqummiunneqareersimammat, oqaluuserissallugu tunngavissaqanngitsoq.
Tamanna qanoq ataqatigiinnersoq paasiuminaappoq.
Immikkoortoq 71 ima oqaasertaqarpoq:
Inatsisartut Kukkunersiuinermut Ataatsimiititaliataata nalunaarusiamikkut sakkortuumik isornartorsiuinerat qanoq iliornikkut malitseqartitsiviginissaa pillugu apeqquteqaat aallaavigalugu oqallinnissamik siunnersuut.
Naalakkersuisoqatigiit isumaqarput ersarilluinnartoq Kielsen suliami attuumassuteqarpallaarsimanngitsoq inatsisinillu unioqqutitsisimanngitsoq. Inatsisartuni sulinermi suleriaasiat ersarluppallaarsoraat, ataatsimiititalianut paasissutissanik tunniussiniarnermut tunngasuni, inatsillu allanngortinneqartariaqarsoralugu siunissami taama pisoqaqqeqqunagu.
Illuatungiliuttut isumaqarput ersarilluinnartoq Kielsen inatsimmik unioqqutitsisimasoq. Taaneqarput suliamut attuumassuteqarpallaarneq, ataatsimiititalianut paasissutissanik tunniussiumannginneq, Kielsenip angallataatimi nipisanniarnerup nalaani attartortinnerata nalaani pisariaqartunik akuersissuteqarsimannginnera.
Kukkunersiuinermut ataatsimiititaliaq qanoq allappa?
Suliaq pillugu kukkunersiuinermut ataatsimiititaliaq sakkortuumik isornartorsiuisimavoq. Inatsisinik unioqqutitsisoqarsimaneranik eqqartuussisussaanngilaq, isornartorsiuinerli tunngavigalugu Inatsisartunut saqqummiussissalluni. Tamannalu tunngavigalugu Inatsisartut maanna oqallipput.
Nivi Olsen isumaqarpoq illuatungiliuttut Kielsenimik uppititsiniaasut, pissaanermillu piniarsarisut pissutissaanngitsut tunngavigalugit.
Nivi Olsen aamma Aleqa Hammond isumaqarput Kukkunersiuinermut Ataatsimiititaliaq ersarissumik allataqarsimasoq suliami inatsimmik unioqqutitsisoqarsimanngitsoq.
Erik Jensen Kukkunersiuinermut Ataatsimiititaliami siulittaasutut oqaaseqarpoq erseqqissaassuteqarluni ataatsimiititaliap suliassani suliarisimagaa, suliamilu inerniliussat Inatsisartuni oqallisigisassatut saqqummiunneqarsimasut, malitseqartitsinissaq pillugu.
Tillie Martinussen (SUL) arlaleriarluni erseqqissaassuteqartaraluarpoq Inatsisartut tassaammata nunatsinni oqartussaanerit, aammalu Kukkunersiuinermut Ataatsimiititalip nassuiaataa tunngavigalugu Inatsisartut kinguneqartitsinissamik aalajangiisussaasut.