Nipisattassiissutit amerlineqarnerat nassuiaatitaqanngitsoq
Aalisarnermik suliaqartut kattuffiillu inassuteqaataannut akerliusumik, Naalakkersuisoq nipisattassiissutinik qaffaasimapput. Pissutaasoq paasiuminaappoq.
Nipisaat suaannik pisassiissutit sooq 204 tonsinik qaffanneqarsimanersut paasiuminaappoq, tassa MSC-mik allagartalerneqasimanerup annaaneqarsinnaanera eqqarsaatigalugu. Inuussutissarsiutillit kattuffiillu oqaatigisajoorpaat, suaat nunanut tamalaanut tunineqarnissaannut akigititallu pitsaasup attatiinnarneqarnissaanut MSC pingaarutilipilussuusoq.
Sermitsiaq.AG-mit Aalisarnermut, Piniarnermut Nunalerinermullu Naalakkersuisoq Jens Immanuelsen suliaq pillugu oqaaseqartinniarneqaraluarpoq, taassumali immikkoortortaqarfimmi pisortaq Bigitteh Jacobsen, allakkatigut akissuteqarsimasoq innersuussutigivaa.
- Naalakkersuisoqarfik ilaatigut aqutsiveqarfinni NAFO 1C-mi aamma 1D-mi (Nuuk Maniitsorlu) nipisattassiissutit qaffanneqarnissaannut tunngatillugu KNAPK-p qinnuteqaataanik tigusaqarsimavoq, aalisarnerup naatsorsuutigisamit ingerlalluarnerusimanera aamma ukioq manna pisassiissutigineqartut tamakkerlugit pisarineqapallassimanerat pissutigalugit. Aqutsiveqarfinni pineqartuni nipisattassiissutinik qaffaanikkut, sineriammut qanittumi aalisartut pisariaqartitaannik aalisarsinnaanerat annertusineqassaaq.
Pisassiissutinik qaffaalaarnissaq pillugu tusarniaanermut akissut
KNAPK-mit Sermitsiaq.AG-mut ilisimatitsissutigineqarpoq, pisassiissutinik qaffaasoqalaarnissaanik piumasaqarsimallutik, aamma pisassiissutinik tamarmiusunik qaffaanissamut sanilliullugu, aqutsiveqarfinni allani pisarineqanngitsoorsimasut aqutsiveqarfinnut allanut nuunneqarsinnaanerannik siunnersuuteqarsimallutik. Pisassiissutinik qaffaanissamut tunngatillugu Naalakkersuisut tusarniaanerannut KNAPK-p akissutitut nassiussimasaa aqqutigalugu Sermitsiamit tamanna uppernarsarneqarpoq.
MSC nungusaataanngitsumik aalisarnermut takussutissaq pingasunik tunngaveqarpoq, aalisartut tamarmik malitassaannik
Aalisagaqassuseq - Imartatsinni aalisagaqarluarpa? Aalisarnermi aalisakkanik peqartuarnissaanik qulakkeerinilluni ingerlatsisoqassaaq, aamma aalisakkat amerliartortillugit peqqissuutillugillu ingerlatsisoqassaaq
Avatangiisinut sunniutigisinaasaasa annikillisarneqarnissaat - Sunik sunniuteqartarpa? Aalisarneq mianersortumik aqunneqassaaq, aalisakkat taakkulu inuuffigisaat peqqissuujuartinniarlugit
Aalisarnermik aqutsilluarneq - Aalisarneq aqunneqarluarpa? Aalisarnermi MSC-mik atuisut inatsisinik atuuttunik malinnissapput, imaanilu avatangiisit allanngornerannut naleqqussarsinnaassallutik .
Akissuteqaammi aalla imatut allassimasoqarpoq:
- Erseqqissaatigineqassaaq, pisassiissutit annertuumik qaffanneqarnissaannik KNAPK-mit piumasaqartoqanngimmat.
Aqutsiveqarfinni 1D-mi 1C-milu pisassiissutinik qaffaasoqareermat, nuna tamakkerlugu pisassiissutit tamarmiusut taamaalillutik 1.363 tonsinngorput, allaqqaammut Pinngortitaleriffiup 2020-mut inassuteqaataasa 1.159 tonsit annertoqqatigisimagaluarpaat.
Annaasaqarsinnaaneq ilisimaarigaluarpaat
Nipisaat suaasa MSC-mik allagartalerneqarsimanerat attatiinnarniarlugu, tunngaviit pingasut malinneqarnissaannut sooq mianersortoqannginnerunersoq paaserusullugu Sermitsiaq.AG-p Naalakkrsuisoq oqaloqatigerusussimagaluarpaa. Tassungali atatillugu immikkoortortaqarfimmi pisortaq aamma allakkatigut akissuteqarpoq .
- Naalakkersuisut aqutsinissamut pilersaarummik TAC-tullu aalajangiussamik malinninnginnermiMSC-mik annaasaqarsinnaaneq ilisimaarivaat, nipisanniarnissamulli akuersissuteqaqqinnissamut atatillugu allagaqartaqartinneqarnerup attatiinnarniarneqarnera soorunami sulissutigineqarpoq.