Nipisat suaasa akii: KNAPK akerliussutsimik takutitsinissamik aalajangiusimannippoq

KNAPK-p tungaanit naaperiaanerigaluit kinguneqanngimmata isumalluarneq ilungersuanermik taarserneqarsimavoq. Royal Greenland-ip nalunaarutigeqqaakkaminut sanilliullugu kilomut 3 koruuninik qaffaassalluni nalunaarnera kattuffiup tigulluanngilaa:

- KNAPK-p tungaanit piumasaqarpugut kilomut 5 koruuninik qaffaasoqassasoq aammalu bonusi 1 koruuniuinnassasoq. Royal Greenland uagutsinnut saaffiginnissimagaluarpat uagutsinnullu akigitikkusutaminik saqqummiussisimagaluarpat, taamaalillunilu isumaqatigiinniarniviit ingerlanneqarsinnaasimagaluarpata, arlaatigut naapiffeqarsinnaassagaluartugut qularinngilara. Tamannali pinngilaq, tassami kingumut Royal Grenland nammineq aalajangiinnarpoq qanoq akeqartitsiniarnerluni, tamatumalu malitsigisaanik uagutsinnut saaffiginnissuteqarnani sumiiffinni tunitsiveqarfinni allagartamik nivinngaassuiinnarpoq suliffeqarfik qanoq aalajangersimanersoq ilisimatitsilluni, tamannalu assut isornartoqartipparput, KNAPK-p siulittaasua Nikkulaat Jeremiassen taamak oqarpoq.

Ataasinngormat Royal Greenland aalajangerpoq nipisaat suaannik tunisinermi kilomut aki 22 koruuniniit 25 koruuninut qaffanneqassasoq aammalu 1 koruunimik kilomut bonusisitsisoqassasoq, aalisarneq aallartinneqarsinnaaniassammat. Tamannali KNAPK-p tungaanit naammagineqanngilaq, taamaammallu marlunngornermi nalunaaqutaq 13:00 akerliussutsimik takutitsinissamik pilersaarutigineqartoq attatiinnarneqarpoq.

27 koruunik aammalu 1 koruunimik bonusisiaqartitsisoqassasoq piumasaavoq

Nikkulaat Jerimiassen oqaluttuarpoq Royal Greenland-imit arfininngormat attavigineqarsimalluni, namminerli paasinninnini naapertorlugu attaviginninneq isumaqatigiinniutissaanani ilisimatitsissutaannaavoq:

- Isumaqaqqaaraluarpunga kiisami isumaqatigiissuteqarsinnaassasugut tamatta atsioqataaffigisinnaasatsinnik, tutsiuttorli malartitassaanani erseqqissaavoq nalunaarutiginninniaannarsimalluni naaperiaanissamillu isaassinerigaluarput itigartippaa, innersuussutigalugu suliffeqarfimmit taamak periaaseqarnertik allanngortinneqarnavianngitsoq, Nikkulaat Jeremiassen oqarpoq.

Taanna oqaluttuarpoq tutsiuttumut kissaateqarsimagaluarluni taakku qaavatigut 2 koruuninik ilasisoqassasoq, tassani innersuussutigalugu aalisarneq saqitsaattoqarnera pissutigalugu kinguaattooqqammat iluarsiisoqarniassammat. Royal Greenland saqitsaattoqalernissaanik pinngitsoortitseriaraluarnikuuvoq martsip naalernerani nalunaarutigalugu siorna akigitinneqartut attatiinnarneqassasut, tamannali KNAPK-mit kissaatigineqanngilaq akuerineqaranilu. Taamaammat aalisartut massakkut arnarlunniarlutik aallartinnissaminnut akunnattooqqapput sineriak tamakkingajallugu.

KNAPK piumasaqaraluarpoq suaat kilomut 27 koruuneqartinneqassasut saniatigullu bonusi 1 koruuniussasoq, taannali Royal Greenlandip tungaanit naaperiarumaneqanngilaq, KNAPK-p siulittaasua pakatsisimaqaluni oqaluttuarpoq.

KNAPK-p piumasani pisimagaluaruniuk kattuffiup akerliussutsimik takutitsinissamik pilersaaruteqarnini taamaatissallugu piareersimaffigisimagaluaraa taanna erseqqissaavoq. Taamaattorli tassa Royal Greenland-ip 25 koruuninut aalajangiinera aammalu Naalakkersuisut saqitsaannermut akuliukkumannginnerat KNAPK-mut ajornakusoortitsilerpoq allagartarsuit poortoqqiinnarnissaannut.

Siornali oktobarimi isumaqatigiinniarusukkaluarpoq

KNAPK-p siulittaasua, Nikkulaat Jeremiassen naapertorlugu KNAPK siornali oktoberimi Royal Greenland-imik aammalu saniatigut Naalakkersuisunik isumaqatigiissuteqarnissaq siunertaralugu naapitsiumajuarsimagaluarpoq.

- Naapitserusunnerpulli isumaqatigiinniarusunnerpulli tusaaneqanngilaq, ilungersoraluarnerpullu angusaqarfiginngilarput. Allaat Naalakkersuisut piginnittut sinnerlugit qisuariartussaagaluit akuliukkumanngillat ingerlatseqatigiiffimmullu inuiaqatigiit pigisaannut anngaasussiaannartutut allaat oqaatigineqartariaqarput, pissutsillu taamaannerat akuersaaginnarsinnaanngilarput, taamaammallu akerliussutsimik takutitsinissamik pilersaaruteqarnerput attatiinnassavarput, Nikkulaat Jeremiassen erseqqissaavoq.

Naalakkersuisut akuliuttariaqarnerarlugit piumasaq attanneqarpoq

Sooq Naalakkersuisut akuliutsinneqassanersut, illuatungeriillu namminneq aaqqiagiinnginnertik iluarsiniaannartariaqannginneraat aperineqarami, Nikkulaat Jeremiassen akivoq, maannakkut pisut imaaliallaannaq pinngitsut, qaammaterpassuilli namminersorlutik oqartussat ingerlatseqatigiiffiutaannik paaseqatigiikkusulluni oqaloqatiginninnissamik kissaateqaraluarnerit kinguneqanngitsut killiffigigaat, aammalu KNAPK-p tungaanit Naalakkersuisunut maluginiaqquneqarsimagaluartoq aallariarfeqanngitsumik kanngittooqqasoqartoq killiffillu uninngaffigineqaallaleqqasoq, RG-llu nammineq kisermaassilluni aalisarnermi qanoq pisoqassanersoq aalajangiinnartarnerata kingunerigaa.

Allatut oqaatigalugu Royal Greenland-ip KNAPK-p piumasarisai naaperiarumanngilai illuatungaanilu Royal Greenland-ip akigitinniakkaminik aalajangiussinera KNAPK-p akueriumanngilaa.

Ilaasortat tunuliaqutaasut tapersersuisullu erseqqissaavoq

KNAPK piffissami kingullermi avissaartuunnermik nalaataqartarpoq. Avissaartuunnerit ilaat ima annertutigisarput allaat ilaasortat ilaat kattuffimminnit aneriarlutik namminneq kattuffiliortarlutik.

Aperineqarami sooq Paamiuni immikkoortortaqarfik kattuffiup sulissutaanut akerliusumik iliornersoq, Nikkulaat Jeremiassen erseqqissaateqarpoq immikkoortortaqarfiit allat tamarmk ataatsimoorluinnartut, aammalu ilaasortat piumasarisaat tunngavigalugit assersuutigalugu matumani nipisat suaat pillugit saqitsaannermi pillugu kattuffik anguniagaqartoq, taamaammalu ilaasortat piumasarisaat naammassineqartinnagu aalisarnerup aallartinneqarnissaa naatsorsuutigineqassanngitsoq:

- Ilaasortatta piumasaat uagut suliassaraagut, aamma erseqqissaatigissavara ataatsimoorluinnaratta, aamma avataaniit avissaartuutsinneqarnissarput ajornakusoortinniarneqartaraluartoq. Assersuutitut taasinnaavarput Royal Greenland ilaasortatsinnut ataasiakkaanut immikkoortortaqarfinnullu ataasiakkaanut avaqqulluta isumaqatigiinniartarpoq. Taamaakkaluartorli tassa sinerissap qanittuani aalisarnermi atugassarititaasut pillugit ataatsimoorpugut, Nikkulaat Jeremiassen oqarpoq.