Nipisanniarnissaq kinguartinneqarpoq - isumaqatigiissuteqartoqarsinnaanngimmat

KNAPK Royal Greenlandilu nipisaat pillugit akigititassanik isumaqatigiissuteqarsinnaanngimmata, nipisanniarneq ullumikkut aallartinneqassanngilaq.

Namminersorlutik Oqartussanit sisamanngornermi unnukkut ilisimatitsissutigineqarpoq, nipisanniarnissaq pilerigineqartaqisunillu suanniarnissaq pilersaarutaasimagaluartutut ullumi tallimannornermi aallartinneqassanngitsut.

Tamatumunnga pissutaavoq, aalisartut piniartullu kattuffiata KNAPK-p Namminersorlutillu Oqartussat aalisakkerivittut ingerlatseqatigiiffiutaata Royal Greenlandip isumaqatigiinngissuteqarnerat.

Namminersorlutik Oqartussat naatsumik nalunaaruteqarlutik allapput, KNAPK-p aqutsiveqarfinni assigiinngitsuni nipisanniarneq qaqugu ammarneqassanersoq pillugu KNAPK Aalisarnermut Piniarnermullu Naalakkersuisoqarfimmut nalunaaruteqassasoq.

Aalisarneqarsinnaanngitsut, pisiarineqarsinnaanngitsut tunineqarsinnaanngitsulluunniit

- KNAPK-mit ullumi ulloq 31. marts 2022 Naalakkersuisoqarfimmut nalunaarutigineqarpoq, akigititassat pillugit Royal Greenlandimik isumaqatigiissuteqannginneq pissutigalugu ullormi sumi nipisanniarnerup aallartinneqarsinnaanera nalunaarutigisinnaanagu, Namminersorlutik Oqartussat allapput.

- Naalakkersuisoqarfimmit ulloq nipisanniarluni aallartiffissaq nalunaarutigitinnagu, nipisanniartoqarsinnaanngilaq, nipisaat suaannik tunisaqartoqarsinnaananilu pisisoqarsinnaanngilaq, nalunaarummi allassimavoq.

Piffissami sivisulaartumik isumaqatigiissuteqartoqarsinnaasimanngilaq. KNAPK-p siulittaasuata Nikkulaat Jeremiassenip sapaatip-akunnerata ataatsip matuma siornatigut oqaluttuaraa, nipisaat suaannut akigititassat pillugit isumaqatiginninniarneq uninngasoq.

Tunniutiinnarusunngitsut

KNAPK-p siulittaasuata sisamanngornermi unnulluinnartoq nalunaarutigaa, akigititassat pisarineqarsinnaasullu annertussusissaat pillugit suli isumaqatigiissuteqartoqanngitsoq.

Ifølge KNAPK naapertorlugu, Royal Greenlandimi nalunaarutigineqarsimavoq tonsit qanoq amerlatigisut tunineqartarnissaat kissaatigineqartoq, KNAPK-li naapertorlugu pisassiissutissatut akuerisaasut tamakkiisumik atorneqarsinnaanngillat.

- Nipisat suaat pillugit akinut isumaqatigiissuteqartoqarsimannginnera ilungersunarpoq, aammalu tulaassuinerup aallartinnissaanik ulluliisoqannginnera. Kisianni suli akinut isumaqatigiissuteqartoqarsimatinnagu, KNAPK tunniutiinnarusunngilaq, taamaattumik Royal Greenland A/S-imit qisuariartoqarnissaa utaqqimaarneqarpoq, Nikkulaat Jeremiassen allappoq.

Powered by Labrador CMS