KL

DK

Nipisanniarnermik suliaq inatsisip allanngortinneqarneranik kinguneqassasoq

Inatsisissatut siunnersuummit Kukkunersiuinermut Ataatsimiititaliap piginnaatitaanera aamma paasissutissanik atortussanillu pissarsisinnaatitaanera pillugit Inatsisartut aamma Naalakkersuisut pillugit inatsisartut inatsisaanni aalajangersakkat erseqqissarneqarneqartussanngorput. Siunnersuutip saqqummiunneqarneranut tunngaviuvoq nipisanniarnermik suliaq, Kukkunersiuinermut Ataatsimiititaliap allakkianik pissarsiniarnermik ajornartorsiuteqarfigisimasaa.

merete lindstrøm

Nipisanniarnermik suliap kingunerisai maanna inatsisissatut siunnersuummik, ukiukkut ataatsimiinnermi februaarip 16-iani aallartittussami suliarineqartussamik, kinguneqartussanngorput.

Siunnersuutip siunertaraa Kukkunersiuinermut Ataatsimiititaliap piginnaatitaanera aamma paasissutissanik atortussanillu pissarsisinnaatitaanera pillugit Inatsisartut aamma Naalakkersuisut pillugit inatsisartut inatsisaanni aalajangersakkat erseqqissarneqarnissaat, inatsisissatut siunnersuummut oqaaseqaatini allassimasoqarpoq.

Siunnersuut aqqutigalugu erseqqissarneqassapput:

· Kommunit Namminersorlutillu Oqartussat missingersuutaat naatsorsuutaallu pillugit Inatsisartut inatsisaanni § 39, imm. 1 naapertorlugu Nunatta Karsiata naatsorsuutaanik taakkununngalu kukkunersiuisup oqaaseqaataannik ataatsimiititaliap ukiumoortumik misissuataarinnittarneranut inatsisit eqqarsaatigalugit isornarsinnaasunik kukkunersiuineq eqqarsaatigalugu kukkunersiuisup oqaaseqaatai aamma ilaasut.

· Ataatsimiititaliaq tamatuma saniatigut qaqugukkulluunniit ingerlatsinermik kukkunersiuinermik aallartitsiinnarani oqaluuserinniinnarluniluunniit, kisianni aamma inatsisit eqqarsaatigalugit isornarsinnaasunik kukkunersiuilluni misissuinernik aallartitsillunilu oqaluuserinnissinnaasoq.

· Ataatsimiititaliap kukkunersiuisoq Inatsisartut toqqagaat tamatuminnga qinnuiginngikkaluarlugu atortussanik pissarsiniarsinnaatitaanera Nunatta Karsiata naatsorsuutaanik taakkununngalu kukkunersiuisup oqaaseqaataanik ataatsimiititaliap ukiumoortumik misissuataarineranut atuuttoq taamatullu aamma ingerlatsinermik kukkunersiuilluni misissuinerit aamma inatsisit eqqarsaatigalugit isornarsinnaasunik kukkunersiuilluni misissuinerit ataatsimiititaliap aallartitai oqaluuserisaaluunniit eqqarsaatigalugit atuulluni.

· Naalakkersuisut ataatsimiititaliap qinnuteqarneratigut pisussaaffeqartut atortussat suugaluartulluunniit ataatsimiititaliap suliassaminik isumaginninneranut pingaarutillit tunniunnissaannut.

Ukiakkut ataatsimiinnermi Inatsisartut siulittaasuata, Vivian Motzfeldtip, allakkianik, Nalaakkersuisut nipisattassiissutinik qaffaaniarlutik aalajangermata Kielsenip umiatsiaminik nipisanniarnermi aalisartumut attartortitsisimanerata nalaani Kielsenip suliaminik isumaginninnermini attuumassuteqarpallaarsimasinnaaneranik misissuinermut atatillugu Kukkunersiuinermut Ataatsimiititaliap iluaqutigisassaannik, Naalakkersuisut tunniussitinnissaat ajornartorsiutigisimavaa.

Kukkunersiuinermut Ataatsimiititaliap piginnaatitaanera pillugu nalorninartut

Vivian Motzfeldtiliu siunnersuutip maanna piareerneqarsimalerneranik aamma naammagisimaarinnilluarpoq.

- Siulittaasoqarfik tamarmiusoq inatsisissatut siunnersuutip suliarineqarneranut tunuliaqutaavooq inatsisillu erseqqissaassuteqarfiunissaanik piumasaqarsimalluni.

Nipisanniarnermik suliap ingerlanneqarnerani Kukkunersiuinermut Ataatsimiititaliaq aamma Aalisarnermut Ataatsimiititaliaq allakkianik kiisalu eqqartuussissuserisup Kim Kielsen sinnerlugu suliamik misissuisimasup, aamma Naalakkersuisut akornanni allaffigeqatigiissutaasimasunik piumasaqaateqarneranni itigartinneqarsimapput.

Kukkunersiuinermut Ataatsimiititaliap atortussanik Naalakkersuisunit tunniussinissamik piumasaqarsinnaanera kiisalu attuumassuteqarpallaarnermut apeqqummik oqaluuserinninnissamik ataatsimiititaliap piginnaatitaanera apeqquserneqarsimapput, inatsisissatut siunnersuummut oqaaseqaatini allassimasoqarpoq.

Inatsimmik kukkusumik nassuiaaneq pinngitsoortinneqassaaq

Taamaattumik pissutsinik taama ittunik pisoqaqqeqqunagu inatsit maanna erseqqissarneqartussanngorpoq.

- Inatsimmi oqaatsit atorneqartut oqallinnermut tunngavigineqassanngillat, Vivian Motzfeldt Sermitsiaq.AG-mut oqarpoq.

Vivian Motzfeldtip erseqqissaatigaa, allakkianik paasissutissanillu pisariaqartunik pissarsiniarneq ataatsimiititalianut siusinnerusukkut ajornartorsiutaasimanngitsoq.

- Inatsisartut inatsisaasa Naalakkersuisunit qaffasinnerusumik inissisimanerat assortuussutaassanngilaq. Inatsisartut nakkutilliisussaapput, ataatsimiititaliallu tamat oqartussaaqataanerannut nakkutilliisutut sulinerannut aporfissalersuisoqassanngilaq, oqarpoq.

Læs hele sagen:

politikki aalisarneq piniarnerlu inuiagatigiit
Powered by Labrador CMS