Nipisanniarneq MSC-mik meqqileqqinneqartoq
MSC nipisanniarnerlu, siorna TAC tamarmiusoq sinnerlugu pisassiissutit qaffanneqarmata oqaluuserineqaraluaqisut, Nunatsinni nipisanniartarneq MSC-mik meqqileqqinneqarsimavoq.
Nipisanniartarneq 2021-mi februaarip qaammataani MSC-mik meqqileqqinneqarnissaa akuerineqarsimavoq. Akuerineqarnissamut piumasaqaataasimavoq, saniatigut pisarisoorneqartartut annikillisarneqarnissaanik sulissuteqartoqarnissaa, MSC tusagassiorfinnut nalunaaruteqarnermi ilisimatitsivoq. Tamannalu aalisarnermik inuussutissarsiuteqartunit nuannaarutigineqarpoq.
- Tamanna nuannaarutigilluinnarparput, nipisaammi suaannik tunisaqarsinnaanitsinnut tamanna tunngaviummat, Polar Seafoodip siulersuisuini siulittaasoq Henrik Leth Sermitsiaq.AG-mut oqarpoq.
MSC-mik meqqiliisarneq akuersisartunit arlaannaannulluunniit attuumassuteqanngitsunit suliarineqartarpoq. MSC ukiut tallimakkuutaarlugit tunniunneqartarpoq, ukiulli tamaasa misissuisoqartarluni.
Siorna akitigitat pitsaanerpaaffianni tunisinermi kiilumut 40 koruuninik akeqarsimapput, coronali atuutilermat neriniartarfinnit piumaneqarunnaarsimapput.
Tamatuma malitsigisaani niuerfik mikisunnguaq tatineqarsimavoq, taamalu akigititat apparujussuarlutik. Suaat siornamut sanilliullugu maannakkorpiaq 20 koruunit missaannik akikinnerulersimapput.
- Island ukiut marlussuit qaangiummata MSC-mik meqqileqqinneqarsimavoq, tamatumanilu unammillersinnaassuserput ajoquserneqarsimalluni. Nipisaativut MSC-mik meqqilerneqarsimanngitsuuppata ajorluinnartumik kinguneqarsimassagaluarpoq, Henrik Leth oqarpoq.
Aamma atuaruk, Nipisaat: Island ukiuni arlalinni MSC-mik amigaateqarsimavoq