MSC-mik akuersissutiginninneq

Nipisanniarneq MSC-mik akuersissuteqarfigineqarpoq

Kitaani nipisanniarneq MSC-tut Det Norske Veritas aqqutigalugu akuersissutigineqaqqammerpoq

Nipisat Kitaani MSC-mik akuersissuteqarfigineqarput

Kalaallit Nunaata kitaata sineriaani nipisanniarnerup MSC-tut ilisarnaaqquserneqartalernissaa ukiut marluk sulissutigineqareersorlu Det Norske Veritasimit maanna akuersissutigineqarpoq.

Aalajangiussinerlu suliniuteqaqataasunit aalisartunit suannillu pisiniartartunit nuannaarutigineqartoq, Royal Greenland nittartakkamini allappoq.

Royal Greenlandimi CSR-imut akisussaasuusoq Lisbeth Shönemann-Paul unnersiorpoq, sulissutigineqarnera peqataasunit tamanit tapersersorneqarluarsimasoq, aalisartullu peqataasimasut akuulluarsimanerannik qutsavigalugit.

Aalisartut nuannaartut

Aalisartut bonusinik pissarsilaartalernissamik qilanaarinnissinnaalersut nuannaarput, bonusimmi nipisat suaannut kiilumut 1 koruunimiit 2 koruuninut qaffanneqassapput.

- Aalisartut kattuffianniit nuannaarutigeqaarput MSC-mik akuersititsiniarluni suliniuteqarneq kinguneqarluarmat. Tamatumuuna kalaallit tunisassiaasa niuffaffinnut iluanaaruteqarfiunerusinnaasunut aqqutissiuunneqarnerat qulakkeerneqarpoq. Kingumuttaaq uppernarsaqqinneqarpoq, Kalaallit Nunaanni aalisarneq nungusaataanngitsumik ingerlanneqartoq, Tønnes Berthelsen KNAPK-mit oqarpoq.

Tuniniaanermut iluaqutaassasoq

Royal Greenlandip tunisassialerinermut immikkoortortaqarfiani aamma nuannaarneqarpoq, nunani aalajangersimasuni tamatuma tuniniaanermut iluaqutaanissaa ilimagineqarmat.

- Pingaartumik nunani Tysklandimi Sverigemilu MSC-mik ilisimasaqarluarfiusumi pisisartullu ilisimasaqarfigisaanni tuniniaanitsinnut iluaqutaavoq, Royal Greenlandimi tunisassialerinermi pisortaq Lise-Lotte Callesøe York oqarpoq.

Akuersissumi ukioq manna tunisassiat aamma ilaatinneqarput, taamaammat kalaallit tulaassuisartut Islandimi tulaassuisartut assigalugit MSC-mik ilisarnaaqqutilinnik maanna tunisisinnaalerput.

Aamma atuakkit:

Nipisat suaannik isumaqatigiissut KNAPK-mut ilaasortaanut iluaqutaassaaq

Powered by Labrador CMS