Nipisaat: Island ukiuni arlalinni MSC-mik amigaateqarsimavoq

Naalakkersuisut nipisaat suaannik pisassiissutit qaffakkamikkit, MSC-mik annaasaqarsinnaapput. Tamanna Islandip 2018-imi misigisimavaa, utertinniarlugulu suli maannamut sorsuuteqarlutik.

Naalakkersuisut sapaatip akunnerani kingullermi, Nuummi Maniitsumilu nipisaat suaannik pisassiissutit 204 tonsinik qaffappaat. Pisassiissutit katillugit 1.159 tonsit taamaalillutik 1.363 tonsinngortinneqarput. Pinngortitaleriffimmi biologit 2020-mi 1.159 tonsit pisassiissutissatut inassuteqaatigisimavaat.

MSC nungusaataanngitsumik aalisarnermut takussutissaq pingasunik tunngaveqarpoq, aalisartut tamarmik malitassaannik

Aalisagaqassuseq - Imartatsinni aalisagaqarluarpa? Aalisarnermi aalisakkanik peqartuarnissaanik qulakkeerinilluni ingerlatsisoqassaaq, aamma aalisakkat amerliartortillugit peqqissuutillugillu ingerlatsisoqassaaq

Avatangiisinut sunniutigisinaasaasa annikillisarneqarnissaat - Sunik sunniuteqartarpa? Aalisarneq mianersortumik aqunneqassaaq, aalisakkat taakkulu inuuffigisaat peqqissuujuartinniarlugit.

Aalisarnermik aqutsilluarneq - Aalisarneq aqunneqarluarpa? Aalisarnermi MSC-mik atuisut inatsisinik atuuttunik malinnissapput, imaanilu avatangiisit allanngornerannut naleqqussarsinnaassallutik.

MDC-mik allagartaqarneq pingaaruteqaqisoq ulorianartorsiortinneqarpoq. Tunngaviit pingasut malillugit allagartaliisoqartarpoq, taakku ilagaat aalisakkat angissusaat naapertorlugit biologit siunnersuuteqartarnerat.

Island uppernarsaamminik 2018-imi annaasaqartoq

Islandip nipisanniarnermi MSC-mik allagartaqarnini 2018-imi annaavaa, aalisarnermi timmissanik puisinillu saniatigut pisaqartoortarneq pissutigalugu. Aalisarnermik inuussutissarsiuteqartunut tamanna kingunerluuteqarsimavoq, Gísli Gíslason, Atlantikup avannaani MSC SR Program Manageriusoq erseqqqissaavoq.

- Nipisaat suannik tunisaqarfiunerpaasarput Frankrig, Tyskland, Danmark Sverigelu. Nunat taakku MSC-mik meqqeqarnissaq pingaartilluinnarpaat, taammammat Islandimiit nipisaat suaannik tunisiffiginiarnerat ajornarnerulersimaqaaq, akigititallu ajornerulersimallutik, Gísli Gíslason oqaluttuarpoq.

Islandimi mSC-mik annaasaqarneq 2018-imi 2019-imilu aalisarnermut eqquisimavoq, neriuutigineqarporli sumiiffiit saniatigut pisaqartoorfiusartut matuneqarnerisigut, ukioq manna allagartamik pissarsisoqaqqissinnaanera.

Arlaannaannulluunniit attuumassuteqanngitsut naliliisarnerat

MSC-mik allagartaliisarneq kattuffimmit arlaannaannulluunniit attuumassuteqanngitsumit isumagineqartarpoq. Allagartaq ukiuni tallimani atuuttussatut tunniunneqartarpoq, ukiulli tamaasa nakkutilliisoqartarluni.

Aalisarnermi arlaannik nutaanik pisoqassappat allagartalersuisartut immikkut nakkutilliiartorsinnaapput. Tamanna pissappat, nalilerneqassaaq pissutsit nutaat tunngavinnut pingasunut naapertuunnersut. Nalilersuinermi kisitsisit allanngortinneqarsinnaapput, ajornerpaamillu pisoqassappat aalisarnermi MSC-mik aallagartaqarneq annaaneqarsinnaavoq.

Powered by Labrador CMS