Nipisaat suaannik pissarsisoqarsinnaanngulerpoq

Aqutsinissamut pilersaarut malillugu nipisanniarnissaq apriilip aallaqqaataani ammarneqassaaq. Aqutsiveqarfinnili ataasiakkaani qaqugorpiaq aalisartoqarsinnaalernissaa, aalisarnissamut pissutsit pitsaanerpaaffiat aallaavigalugu aalisarnermik ingelataqartut tusanisssiortullu suleqatigiillutik aalajangissavaat.

Aalisarnermut, Piniarnermut Nunalerinermullu Naalakkersuisoqarfiup ilisimatitsissutigaa, aqutsiveqarfiit assigiinngitsut qaqugu aalisarfiusinnaalissasut:

U. 6. april aqutsiveqarfik 1F ammassaaq

U. 7. april aqutsiveqarfik 1C ammassaaq

U. 10 april aqutsiveqarfik 1E ammassaaq

U. 12. april aqutsiveqarfik 1D ammassaaq

U. 15. april aqutsiveqarfik 1Bb ammassaaq

U. 15. april aqutsiveqarfik 1A ammassaaq

U. 1. maj aqutsiveqarfik 1Ba ammassaaq

Aqutsiveqarfinni tamani ataannartumik aalisarfissat ullut 60-upput, ullut ammarneqarfianniit imaluunniit pisassat tamakkerneqarnissaasa tungaanut, Namminrsorlutik Oqartussat ilisimatitsipput.

2021-mi pisassat 1.229,4 tonsiusut aqutsiveqarfinnut agguarneqarneqarsimapput.

Sorna nipisannut tunngatillugit suliat

Siorna Pinngortitaleriffiup 2020-mut inassuteqaatai naapertorlugit nunamut tamarmut 1.159 tonsit nipisattassiissutigineqarput.

Pisassiissutilli 204 tonsinik ilaneqarput, tamatuma kingorna Kim Kielsen pisassiissutinik qaffaasoqarnissaanik aalajangiinermi suliamut attuumassuteqarpallaarsimasutut misissuiffineqarpoq. Pisassiissutinik qaffaaneq aalisarnermik suliaqartunit isornartorsiorneqangaatsiarpoq, aqutsinissamut pilersaarut malinneqanngikkaangat MSC-mik allagartalerneqarsimaneq ulorianartorsiortinneqarmat.

Aalisarnermut, Piniarnermut Nunalerinermullu Naalakkersuisoqarfimmiit aammalu KANUAANA-miit erseqqissaassutigineqarpoq aalisarneq, tunisineq imaluunniit nipisannik suaanillu aqutsiveqarfinni immikkoortuni aalisarnerup ammannginnerani pisineq inerteqqutaasoq.