misilittaaneq
Nipiliortoqarpaluttoq tusaaviuk? F-16-iusimasinnaavoq
Danskit illersuisuisa timmisartut F-16-it Nunatsinni misilittaleruttorpaat
Sakkutuut Issittumi suliassariligassaannut atatillugu Nunatta Kitaani sapaatip akunnerani matumani timmisartumik F-16-imik timmisartortoqassaaq.
Tusagassiivik nalunaarpoq.
Timmisartornerit tassaapput danskit Illersornissamut Ministeriaqarfiata Issittumi suliarisartagaasa pitsanngorsarneqarsinnaaneri pillugit misissueqqissaarnernut massakkut ingerlanneqartunut atatillugu. Misissueqqissaarneq danskit naalakkersuisuinit aallartinneqarsimavoq Namminersorlutik Oqartussanillu peqataaffigineqarluni.
Anguniakkat
- Timmisartornissani pingaarnertut siunertaavoq, Nunatsinni ujarlerluni annaassiniarluniluunniit suliaqarnermi (SAR) timmisartut F-16-it ujaasinerni misilittarneqarnissaat, taamaasiornikkut timmisartup piffimmi sullissivigineqartussami pissutsit qanoq inneri sukkasuumik paasisinnaassavai Nuummilu Issittumi Sakkutooqarfimmut nassiullugit, Tusagassiivik nalunaarpoq, nangillunilu:
- Taamaasilluni timmisartornissani siunertarineqartut marluupput; siullertut, SAR-imik suliaqarnermi Kitaanni sinerissap nakkutigineqarnissaa assiliortorneqarnissaalu, aappaattullu Kangerlussuup Pituffiullu timmisartuussinermi atortuisa misilittarneqarnissaat. Timmisartornerit marlunngornermit sisamanngornermut ingerlanneqassapput, ulloq ataaseq sillimmatitut atorneqarluni.
Issittup annertuumik misissuiffigineqarnissaata ilaatut timmisartornissaq misilittaanertut misiliinertullu 2014-imi 2015-imilu ingerlanneqartussanut ilaavoq, misissueqqissaarnissamilu pineqartumi Nunatta eqqaani immami nunamilu siunissami suliarineqartartussat ilaatinneqarput.