Ilulissat
Nipilersullammaat tusarnaartitsiartorlutik Ilulissialersut
Nipilersortartut 1980’ikkunni nuannarineqarluartut Ilulissani timersortarfimmi tusarnaartitsillutik tallimanngorpat appisimaartussanngorput
Ilulissani timersortarfik tallimanngorpat tusarnaartitsinermik pingasoqiusamik aaqqissuussaqalerpoq nipilersortorissallugit Aasianneersut Angut Clasen aamma Inneruulat Jam, Nuummeersut G-60 kiisalu Ulf Fleischer Paarisa Bandilu.
- Tusarnaartitsineq una aaqqissuunniarlugu aalajangerpugut Ilulissani annertuumik tusarnaartitsinermik ingerlatsisoqarpiarneq ajormat, aaqqissuisuneersoq Ilulissani kulturhaalianeersorlu, Jonas Fleischer Sermitsiaq.AG-mut taama oqarpoq, imalu nangilluni:
- Aamma inuit periarfissikkusuppagut nipilersoqatigiinnik nuannarineqarluartunik, Ilulissanullu tikkiarpiarneq ajortunik, unnuup ataatsip ingerlanerani appisimaarfigineqarlutik misigisaqarnissaannut.
Tusarnaartitsineq nalunaaqutaq 23 aallartissaaq
Pingasoqiusanngorlugu tusarnaartitsineq tallimanngornermi unnukkut aqqanernut aallartinneqassaaq nunatsinni rockimik nipilersortartut nuannarineqarluarnerpaat ilaasa, Aasianneersut Innerulaat, erinarsortorisimasaanit Angut Clasenimit. Taassuma Inneruulat Jam appisimaaqatigissavai.
Taassuma kingorna aamma 1980’ikkut naaneranni 1990’ikkullu aallartinneranni nipilersoqatigiit nuannarineqarluartut appissapput. Tassaapput Nuummersut G-60 Eigil Petersen erinarsortoralugu appisimaarniartut.
Ulf Fleischer aamma Paarisa Band
Pilersaarutaasut malillugit tusarnaartitsineq naggaserneqassaaq Ulf Fleischerimit aamma Paarisa Bandimit, taakkua aamma 1980’ikkut ingerlaneranni nuannarineqarluarput, ilaatigullu aamma Ulf Fleischer arlalippassuartigut tusaqqoorutaasunik saqqummersitsisarsimalluni.
Nuummiut nipilersortartut Qarsoq aamma appisimaartarfimmi Naleqqami tallimanngornermi arfininngornermilu nipilersortuussaapput.