Takorlooriaruk mobilerni app-imut isiinnarlutit nipilersukkat kalaallisuinnaq taallallit kalaalliniillu taamaallaat suliarineqarsimasut assigiinngitsorpassuit tusarnaarsinnaallugit. Nipilersukkanik tusarnaarutini allani ujaaseqqaanngikkaluarlutit, nipilersukkanik tusarnaarummi ataasiinnarmi nunatsinneersunik tusarnaarsinnaalissaatit, app-imimmi nipilersukkanik katersiviusussamik maanna suliaqartoqarpoq.

Suliaqartoqarnera Tusass-ip music ally-mut julimili oqaluttuaraa.

Tusass Musicimi taamani akisussaasuusoq, Thure Tornby Baastrup, allaaserisami issuarneqarpoq, nunatsinni nipilersornikkut kingornutassat ataatsimut katersorneqarnissaat qulakkeerniarneqartoq.

Nipilersortartulli suliniummut, nunatsinni nipilersukkanik immiussinermik suliaqartunit marlunnit suleqataaffigineqartumut, ernumassuteqarlutik oqariartuuteqarput.

Kisermaassisussatut isumaqatigiissut atuutissaaq

Tusass Music pillugu allakkiami, nipilersortartut DiGiDi-mut, nipilersukkanik siammarterinermik suliaqartumut, isumaqatigiissuteqartunut nassiunneqarsimasumi allassimavoq, nipilersortartut Tusass Musicimi ilaalissagunik, Spotifymiit aamma Apple Musicimiit nipilersukkatik peertariaqassagaat.

Nipilersortartut nipilersornermillu suliaqartut arlallit Sermitsiaq.AG-mut oqariartuuteqarput avammut saqqumilaarnerunissaq annaassallugu aarleqqutigalugu, Tusass Music toqqassagaluarunikku.

- Suliniut uagut ilisimasaqarfigisimanngilarput. Suliniut nipilersornermik suliaqartut peqatiginagit ingerlanneqarsimavoq, peqatigiiffippulluunniit tusarniarfigineqarsimanngilaq. Tupannarpoq tusarlugu nipilersukkanik streamerutini allani ilaasinnaajunnaassasut, nipilersortartut tassunga ilaarusukkunik, Kalaallit Nunaanni nipilersortartut peqatigiiffianni siulittaasoq Georg Olsen oqarpoq.

Avaqqunneqarsinnaanngilaq

Tusassimi niuernermik pisortaq, Nikolaj Christoffersen Sermitsiaq.AG-mut nassuiaavoq kisermaassisussatut isumaqatigiissut pisariaqartoq nunatsinni nipilersukkanik streamerummik sanasoqassapput.

- Tusassimi isumaqarpugut kalaallit ataatsimoornerannut aningaasaleeqataanissaq pingaaruteqartoq, nipilersuutillu kinguaariit kingornutassaat katersorneqassasut tusarnaarummi ataatsimi tusarnaarneqarsinnaasunngorlugit. Pingaaruteqarpoq nipilersortartut streameruteqalernissamut ataatsimoornissaat, Kalaallit Nunaanni tusarnaagassiat tusarnaarummi digitaliusumi ataatsimiilerniassammata, Tusassimi niuernermik pisortaq, Nikolaj Christoffersen erseqqissavoq.

Taanna nassuiaavoq Kalaallit Nunaanni nipilersukkanik tusarnaarummik suliaqartoqarnissaa qangali kissaatigineqartarsimasoq. Tusass nipilersukkanillu immiussinermik suliaqartut marluk maanna suleqatigiipput, nunatsinni nipilersukkat katersorniarlugit. Nikolaj Christoffersen erseqqissaavoq app-ip iluanaarutai nipilersortartunut tukkumaartut, app-imi atuilersussat naammatseriarpata.

- Tamanut iluaqutaassasaaq

- App taama ittoq tamatsinnut, pingaartumilli nunatsinni nipilersortartunut iluaqutaassaaq, taakkumi tusarnaarutikkut atuisunit aningaasarsiornerulersinnaalissagamik. Tusassimiit sulissutigaarput tusarnaarut ataaseq, nipilersornermut tusarnaartartunullu siunissami iluaqutaalersussaq, Nikolaj Christoffersen oqarpoq.

- Tunngavik qajannaatsuussappat kisermaassisussaanermut isumaqatigiissut atasariaqarpoq, nipilersukkat amerlanerpaat kisermaallugit app-imiittussanngortinneqarsinnaaniassammata. Erseqqissaatigineqartariaqarpoq app-imi kisermaassisussaanermut isumaqatigiissut taamaallaat streamerinermut atormat. Tassa nipilersortartut saqqummersitatik iTunesikkut Kalaallit Nunaanni aamma Danmarkimi suli tuniniarsinnaajumaarpaat.

Nipilersukkanik streamerilluni tusarnaarut qaqugu saqqummissanersoq suli ilisimaneqanngilaq, piareersaatilli kingulliit ingerlasut, Nikolaj Christoffersen ilisimatitsivoq.