Nipilersortartut killilersuutit qasukkartinneqarnerat nuannaarutigaat
Naalakkersuisut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat taamaallaat isersimaqqusaanerannik piumasaqaataat malillugit killilersuinerit taamaatinneqassasut aalajangermata, nipilersortartut nuannaarluarput.
Ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat taamaallaat isersimaqqusaanerannik killilersuinerit Naalakkersuisunit atorunnaarsinneqarput.
Tamatuma malitsigisaanik tusarnaartitsinernilli tusarnaartitsivissat ulikkaaqqinneqarsinnaanngorput.
Tamannalu nipilersortartut peqatigiiffiani siulittaasup nuannaarutigaa.
- Killilersuutinik qasukkaasoqarnera nuannaarutigeqaarput. Neriuutigaara, nipilersortartut amerlanerusunik isersimasoqarlutik tusarnaartitseqqissinnaanngussasut, Georg Olsen Sermitsiaq.AG-mut oqarpoq.
Nipilersortartut katersuussinnaanermut killilersuinerit pissutigalugit eqqugaasimaqaat. Tusarnaartitsinerit amigaartooruteqarfiusumik ingerlanneqartarsimapput, tassa tusarnaartitsisoqartinnagu angalanerit, ininik attartornerit najugaqarnerillu ilaatigut akilerneqareertussaasarmata. Taamaat tusarnaartitsisoqarpallaartarsimanngilaq, taamaallaat inuitikittunnguit qanimut tikillugit unnuakkut tusarnaartitsisoqarnerusarsimalluni.
Tusarnaartitsisoqartarnissaanut qilanaartoq
Georg Olsenip oqaluttuaraa, peqatigiiffimmi ilaasortat periarfissat pillugit oqaloqatigineqalereersimasut.
- Tusarnaartitsisoqartarnera amigaatigilluinnarparput. Tusarnaartitsinerimmi annertuut tarnikkut nukissaqartitsillualertarlutillu kissalaartitsisarput, tumerparpaartumik tusaasaleqqinnissarput qilanaaraarput, nipilersortartut peqatigiiffianni siulittaasoq oqarpoq.
- Ininut qatserisartoqarfinni oqartussaasunit akuerineqarsimasunut isersinnaatitaasut amerlanerpaaffissaasa affaannaat taamaallaat isersimaqqusaanerannik killilersuinerit atorunnaarsinneqarnerisigut, tusarnaartartut kulturikkut ilanngussanik ukioq manna qilanaartuutissaqarput, taanna oqapoq, kaammattuutigalugulu nipilersortartut periarfissanik tigusisassasut
Festivalertitsisarnissat piareersarneqartut
Nunatsinni Nakorsaaneqarfimmit assatsigut eqqiluisaarnissaq pillugu suli piumasaqaatigineqarpoq. Katersuuffiusunut annertuunut isertut tusarnaariartullu suli imermik, qaqorsaammik assannullu spritsimik suli atuisassapput.
Aasianni Nipiaa Rock Festivalip septembarip pingajuani sisamaanilu ingerlanneqarnissaa pilersaarutigineqareerpoq. Ilaatigut Ole Kristiansen, Enok Poulsen Inneruulallu kiisalu Rockstones festivalimi tusarnaartitsissallutik.
Aamma Nuummi Akisuanernik aaqqissuussisartut oqaluttuaraat, ukioq manna festivalertoqarnissaanu periarfissanik misissuiniarlutik.