nipilersortartut
Nipilersortartut aningaasanut inatsit nuannaarutigaat
Nunatsinni nipilersortartut, aningaasanut inatsimmi nipilersortartut angalanerinut 1 million koruuninit immikkoortitsivigineqarsimanerat nuannaarutigeqaat.
Nunatsinni nipilersortartuisa angalanermut anigaasartuutigisimasatik matussuserneqarnissaannik qinnuteqarsinnaalerput.
Tamanna pivoq Inatsisartuni ilaasortat amerlanerussuteqartut aningaasanut inatsimmi angalanermut aningaasartuutinut atugassanik 1 millionr koruuninik immikkoortitsisoqarnerata kingorna, taamaasillutik nipilersortartut nunatsinni angalasinnaalissapput.
Tamanna Nunatsinni Nipilersortartut tupinnanngitsumik nuannaarutiginngitsuunngilaat.
- Nipilersortartut aasaq oqariartuutigaarput kissaatigalutigu sumiiffiit avinngarusimasut nipilersortartunik tikisitserusuttarnerat pillugu tapiissummik pilersitsisoqartariaqartoq. Nuannaarutigilluinnarparpullu kissaaterput oqariartuuterpullu tusaaneqarsimammat, Kattuffimmi siulittaasoq Inunnguaq Petrussen tusagassiuutinut nalunaarummi oqarpoq.
Nipilersortartulli timersortartunik suleqateqarsinnaanerat, kattuffiup aamma nuannaarutigaa.
- Imaappoq, timersoqatigiiffiit timersortartut unammiarnissaminnut katersuiniartarnerminni nipilersortartunik tikisitsissagunik taperneqarsinnaalissapput. Ilisimavarpummi nuannarineqarluartunik tikittoqaraangat inupparujussuit aggiasartut, Inunnguaq Petrussen erseqqissaavoq.
Taamaammat nipilersortartut angalanerulernissaat, nipilersoqattaarnerulernissaat, kiisalu timersoqatigiiffiit katersinissaminnut iluaqutaalluartussamik periarfissaalerpoq.
- Nuannerluinnartumik siuariarneruvoq, angalanermi tassaavoq aningaasartuut nunatsinni aningaasartuut annerpaaq aporfiusartorlu, Inunnguaq Petrussen oqarpoq.