Nipilersornermik ilinniarfik Simon Lyngep bilitsimik tunineqarneratigut annaanneqartoq

Sermitsiaq.AG-mi sisamanngornermi allaaserineqartutut kalaaleq nipilersortartoq nuannarineqarluartoq Simon Lynge Greenland Express Airip taamaatitsineranit eqqugaavoq Qaqortumilu nipilersornermik ilinniarfimmi Nipitumi ilinniartitsisutut peqataasinnaajunnaarluni.

Atuaruk: Simon Lynge Greenland Express Airip taamaatitsineranit eqqugaasoq

Simon Lyngeli Facebookikkut tallimanngormat nalunaarpoq, Qaqortuliarsinnaanngorluni inuusuttuaqqat aasaanerani ilinniartinneqarneranni ilinniartitsisooqataajartorluni. Air Greenland qanoq pisoqarsimaneranik tusagaqareerluniangalanissaanut aningaasaliivoq.

'Nuannaartorujussuuvunga, neriuppungalu NIPITU-mi inuusuttut nipilersornermik nuannarisaqarluartut aamma nuannaassasut... Air Greenland bilitsima aningaasaliissutiginissaanik neqeroorpoq! Kujataani inuusuttut ilinniartikkiartornissaannut qilanaarpunga! Air Greenland ROCKS!!! @airgreenland'

Simon Lynge Facebookimini taama allappoq.

Aaqqissuisut nuannaartut

Aasaanerani nipilersornermik ilinniarfiup aqutsisua Ivalo Frederiksen Air Greenlandip Simon Lyngemut neqeroorutaanik nuannaarutiginnippoq:

- Nutaarsiassaq tusarakku nuannaajallaqaanga. Simon ilinniarfimmut aalajangiisuulluinnarpoq. Aamma taamaatitsisoqarnera tusaratsigu oqaasipilunnissaq tunuarsimaarfigiuminaappoq. Maanna inuusuttorpassuarnut aasaanerani ilinniarfiit pitsaanerpaartaannik suliaqarnissaq isiginiaqqissinnaanngorparput.

Simon Lynge aasaanerani nipilersornermik ilinniarfimmi kalaallinik nipilersornermik nuannarisalinnik allanik peqateqarluni ilinniartitsissaaq, ilaatigut Nive Nielsen, Charlie Shapiro (Nive Nielsen & The Deer Children), Aviaja Lumholdt, Jonas Nilsson aamma Pilutannguaq Hammeken Small Times Giants peqatigalugit.