Nipilersornermik festivalertitsinissat taamaatiinnarneqartut

Narsap Ilua Festival aamma Sisimiut Festival, nunami sumiiffinnit arlalinnit ornigarluarneqartartut coronamut tunngatillugu malittarisassat kingunerannik taamaatiinnarneqarput.

- Inuiaqatigiit pisussaaffeqarnerannut tapersersuiniarluta festivalertitsinissaq taamaatiinanrniarlugu aalajangersimavugut. Nunammi ammaqqinneqarnera qanoq kinguneqassanersoq naluarput. Taamaammat immitsinnut paarinerput takutinniarlugu tuniluuttoqalersinnaaneralu pinngitsoortinniarlugu taamaatitsiinnarpugut, Peter Larsen Narsap Ilua Festivalimimik aaqqissueqataasoq nassuiaavoq.

Ukioq manna festivalimi pisussat, ulluni 2.-4.juli ingerlanneqartussaagaluartut nipilersortartunik ilisarisimaneqarluartunik ulikkaaraluarput.

Tassa Bartali Crew, Jenseeraq Band, Small Times Giants, Rasmus Lyberth aamma Aviaja Lumholdt nipilersuutinik nuannersunik tusarnaartitsisussat ilagingaluarpaat.

- Soorunami tamanna uggornaraluarpoq, piffissamili matumani ataatsimoorluta immitsinnut paarisariaqarpugut. Piffissaq takkukkumaarpoq katersuuteqqiffisinnaasarput, Peter Larsen oqarpoq.

Sumiiffinnit arlalinnit peqaataasinnaasut amerlanerpaamik 30-t

Aaqqissuussani aalajangersimasuni, sumiiffinnit arlalinnit peqataasinnaasut amerlanerpaamik 30-sarnissaannik piumasaqaateqarnerup festivalernissaq unitsippaa. Nalunaarut nutaaq naapertorlugu, festivalitut aaqqissuussinermi, nunami sumiiffinnit assigiinngitsunit amerlanerpaamik 30-t peqataasinnaatitaapput. Akerlianik peqataasussat sumiiffimmit aalajangersimasumeersut peqataasussaatillugit, aaqqissuussami pisussamiluunniit inuit amerlanerpaamik 250-iusinnaapput.

Narsap Iluani festivalertitsisoqarnerani inuppassuutillugit malittarisassat malikkuminaassapput:

- Kingullermik festivalertitsinermi inuit 2.000-it ataatsikkut peqataapput. Nalunngilarpullu tusarnaariat illoqarfinnit nunaqarfinnillu arlalinnit aggertartut, taamaammat takusinnaalereerparput, festivali ingerlatissagutsigu malittarisassat malissinnaanatigit, aaqqissueqataasoq naggasiivoq.

Aamma Sisimiut Festivali, juulip aappaani pingajuanilu ingerlanneqartussaagaluaq taamaatiinnarneqarsimavoq. Ole Kristiansen, Nanook aamma Nina K. Jørgensen tusarnaarianut aliikkusersuisussat ilagingaluarpat.

- Tusarnaartitsisussat takutitsinissaannut tusarnaartullu qisuariaatigisassaannut qilanaarsimagaluarpugut. Aaqqissuussarli maanna taamaatiinnarparput, tassungalu paarlaallugu aappaagu festivalertitsinissaq pilersaarusiulerlugu. Sisimiut Festivalip facebookkiani allassimavoq.

Aamma Narsap Iluani festivalertitsisartut aappaagu festivalertitsinissaq pilersaarusiorlugu aallartippaat.