piviusulersaarusiaq
Nipilersoqatigiit Sume pillugu piviusulersaarusiaq danskit tusagassiorfiinit nalilerluarneqartoq
Piviusulersaarusiaq 'Sume - mumisitsinerup nipaa' Danmarkimi aamma nuannarineqarluarpoq. Aviisit Jyllands-Posten aamma Ekstra Bladet piviusulersaarusiaq nalilerluarpaat. Aviisit qanoq naliliisimanersut atuarneqarsinnaapput
Nipilersoqatigiit Sume pillugu piviusulersaarusiaq Nunatsinni inunnit 10.000-init amerlanerusunit takuneqartareerpoq. 'Sume - mumisitsinerup nipaa' Danmarkimi aamma takutinneqalerpoq.
Piviusulersaarusiaq Inuk Silis Høeghimit Emile Hertling Péronardimiillu suliarineqartoq danskit aviisiinit sisamanngornermi nalilerneqarpoq.
'Sume - mumisitsinerup nipaa' Danmarkimi ullumi sisamanngornermi takutinneqaqqaassaaq.
Danskit aviisiisa ima piviusulersaarusiaq nalilerpaat:
Berlingske:
Naatsunngorlugu:
'Sume pillugu piviusulersaarusiaq Kalaallit Nunaata ineriartorneqanik takutitsivoq. Malugineqarsinnaavoq piviusulersaarusiaq suliarineqarluarsimasoq. Ilisimatuut amerlanerusut oqaaseqartinneqarsimasinnaagaluarput, nuannaartorinnittut ikinnerusut apersorneqarsimasinnaagaluarlutik. Tamannali aamma ajunngilaq, uani aamma saqqummiunneqarpoq nipilersoqatigiit ukiuni 14-ni nipilersoqatigiinngereerlutik 1988-mi nipilersoqatigiittaleqqinnerat'
Ullorissat sisamat
Information:
Naatsunngorlugu
'Sume - mumisitsinerup nipaa' nunasiaateqarsimaneq pillugu atuarfinni sammineqartalertariaqarpoq. Danskit amerlanerpaartaat ilisimanngilaat susoqarpiarsimanersoq. Kalaallit Nunaanni 'nunasisimaneq' qanoq annertutiginersoq ilisimaneqarpianngilaq. Kalaallit Nunaat pillugu nutaarsiassani kisimi tusartarpagut politikkerit peqquserluttut, Kalaallit Nunaanni imminnut toquttartut amerlanerujussui, nunap pissarititai kiisalu sukkanerpaamik aatsitassarsiulernissaq. Kiisalu tusaqqammerparput angut 33-nik ukiulik Danmarkimi toqusoq peqqinnissaqarfimmit ikiorunneqanngeqqaartoq.'
Ullorialiinngilaq
Jyllands-Posten:
Nipilersornerinnarmiinngitsoq aalassatitsineq
Naatsunngorlugu
'Nipilersoqatigiit taakkut namminersulivikkusupput. Danmarkip nunasiaateqarnera suli Kalaallit Nunaanni misigissutsikkut eqquisarpoq.
Piviusulersaarusiaq Inuk Silis Høeghimit Emile Hertling Péronardimiillu suliarineqartoq ataqqinartuuvoq, attortinnarluni politikkikkut pissutsini nipilersuutaalluni.'
Ullorissat tallimat
Politiken:
Sume: Kalaallit Nunaanni rockimik nipilersornermi mumisitsineq
Naatsunngorlugu
'Sume pillugu piviusulersaarusiaavoq Kalaallit Nunaata nutaanerusortaanik takutitsisoq. Nipilersoqatigiit qanoq sunniuteqarsimanerat ersersinneqarpoq.
Nipilersorneq aqqutigalugu mumisitsineruvoq, inuusuttut eqqarsartaasaannik allanguisoq.'
Ullorissat sisamat
Ekstra Bladet:
Naatsunngorlugu:
'Inuusuttuaraallunga Sume radiokkut nipilersortoq tusaanikuuara. Kalaallit Nunaanni rockimik nipilersortut soqutiginartutut eqqamasaqarfigaara. Kisianni ilisimasimanngilara qanoq annertutigisumik sunniuteqarsimanersut.'
aamma
'Aperigaanni nipilersorneq aqqutigalugu nunarsuarmi allannguisoqarsinnaanersoq, Sume akissutaavoq. Kalaallit Nunaanni rockimik nipilersorput aalassatitsillutillu. Kalaallit Nunaata nutaanerusortaa pillugu piviusulersaarusiaq siulleq saqqummiunneqarpoq.
Ullorissat tallimat