Nipilersoqatigiit marluk nersornaaserneqarput
Sapaatip-akunnerata naanerani kalaallit nipilersortartut Koda Awardsip nersornaatisitinneqarnerannut atatillugu nalliuttorsiortitsisoqarnerani nersornaatit sisamat agguaanneqarput.
Nipilersoqatigiit marluusut Îva Gustav LP aamma Josef Tarrak, nipilersortartunik nersornaasiisoqarneranut Koda Awardsimut atatillugu ajugaasuupput, taanna arfininngornermi Hotel Hans Egedemi Nuummi pivoq.
Tassami ‘Ukiumut Nersornaat 2020’ pissarsiaraat, Koda tusagassiuutinut nalunaarummi taama allappoq.
Nipilersortartut inuusuttut marluk siullermeerlutik siorna saqqummersitsipput, taakkulu nipilersoriaasiat assigiinngitsunik imaqarpoq, tassa rap, elektronisk aamma r'n'b.
Coronap nunarsuaq tamakkerlugu tunillaassuunnera pissutigalugu Kodap nersornaasiinera siorna taamaatinneqarnera pissutigalugu, ‘Ukiumut Nersornaat 2019’ aamma tassani tunniunneqarpoq. Nersornaat taanna Gerth Lyberthimut tunniunneqarpoq.
Isumalluarnartumut nersornaat Jens Kleistimut tunniunneqarpoq, Inneruulallu erinarsortuata ilisarisimaneqarluartup, Angut Clasenip ataqqinaammik nersornaat pissarsiaraa.
- Koda Awardsip ukiunik 30-nik nalliuttorsiutigineqarneranut atatillugu Koda nutaanik inuusalianik suliaqartitsivoq, tamatuma peqatigisaanik ukiut ingerlanerini nersornaaserneqarsimasut inuusaliamik taama ittumik nassinneqassapput, Koda taama nalunaaruteqarpoq.
