Aasiaat
Nipiaa Rock Festivalimi tusaamaneqarluartut appissapput
Aasianni rockfestivalimi nipilersortartut tusaamaneqarluartut arlallit tusarnaartitsissapput
Martin Løvstrøm, I124Q, Qinngorneq, Liima Inui, Zikaza, Inneruulat, Kalak kiisalu Ole Kristiansen.
Tassa taakku Nipiaa Rock Festivalip 17-issaanik ingerlanneqarnerani nipilersussapput, taanna weekendimi Aasiaat timersortarfiani ingerlanneqassaaq.
Aaqqissuisut, Inussuit, siornatigut aaqqissuisuusarsimasunit rockfestivali tusaamaneqarlualersimasoq tiguaat, festivalertoqarnerani tupaallatsitsisoqarumaartoq taakku oqaatigaat.
Festivalertoqarnerani tupaallatsitsinerit
- Aaqqissuussap iluani tupaallannartunik pisoqarumaarpoq, maannakkulli saqqummiutissanngillat, tusarnaarialli qilanaakuttuunginnarsinnaapput, Inussuit siulittaasuat Sakæus Petersen tusagassiuutinut nalunaarummi allappoq.
Taassumalu tusarnaartitsisussat pitsaasutut nalilerlugit nuannaarutigaa.
- Naqqaniit aallartikkaluarluta, pilersaarusiorfissarlu killeqartoq oqaluunneqaraluarluta, taamaattorli isumarput malillungu appisimaartussat ajunngivissut katersorsimavagut, Sakæus Petersen oqarpoq.
Festivali sisamanngorpat aallartissaaq, arfininngorpallu naammassissalluni.
Siorna festivalimit assit takukkit: Aasianni rockfestivaleqarneq