Skip to main content

Nipi ilisarisimaneqarluartoq nipangerpoq

Inatsisartuni ilaasortaasimasoq, tusagassiortoq Henriette Rasmussen toquvoq.

Nunatsinni nipi malunnaatillik ilaat, Henriette Rasmussen toqukkut qimaguppoq.

Qaratsamingut kræfterluni arfininngormat Sana-mi unnukkut 21:32 toquvoq.

Henriette Rasmussen inuiaqatigit akornatsinni nipituuliortorsuartut oqaatigineqarsinnaanngikkaluarluni uteriittuullunilu alapernaatsuuvoq.

Politikkimik suliaqarallarnermini KNR-milu sulingallarnermini taama ilisarisimaneqarpoq.

Henriette Rasmusseni 1991-miik 1995 ilanngullugu Siumut Inuit Ataqatigiillu Naalakkersuisooqatigiinnerisa nalaanni isumaginnermut suliffeqartitsinermullu ilaasortaasimavoq. Marianne Jensenilu 1984-imiik naalakkersuisunut arnani siulliullutik ilaasortanngorsimapput.

Henriette Rasmusseni Qasigiannguani 1950-imi inunngorpoq. Qatanngutigiit arfineq pingasuni Henriette angajullersaavoq.

1975-imi N. Zahles Seminariumimi Københavnimiittumi ilinniartitsisutut allagartartaarpoq. Henriette Danmarkimiinnermi inuusuttut akerliunerat arnallu suliniaqatigiit isumassarsiorfigilluarsimavai, Unge Grønlænderes Råd ilaasortanngorluni.

70-kut aallartilaarneranni danskit kalaallillu arnartaasa atugarisaat arlaleriarluni isornartorsiortarsimavai.

Henriette Rasmusseni Sisimiuni 1977-mi ilinniartitsisunngorpoq Aasivimmillu aallarneeqataalluni. Nunatsinni arnat naligiimmik pineqalernissaat siuttuuffigisimavaa.

ICC aallartinneqarmat ingerlaannaq aamma suleqataalerpoq.

1983-mi Nuummi kommunalbestyrelsemut qinersisoqalermat Henriette Rasmussen Inuit Ataqatigiit tunuliaqutigalugu qinigassanngortippoq. Partiimilu kisiartaalluni kommunalbestyrelsemut qinigaalluni. 1989-mili kommunalbestyrelsemut qinerneqarluarnermigut parteeqatini allat pingasut kommunalbestyrelsemut ilaasortanngortillugit.

1984-miik 1995 ilanngullugu landstingimi ilaasortaavoq 1991-milu naalakkersuisunngorluni.

1979-82-mi KNR-mi kulturikkut immikkoortortaqarfiani programsekretæritut atorfinilluni kingornalu Niuernermik Ilinniarfimmi tusagassiortutut ilinniagaqalerluni.

Henriette Rasmusseni politikkikkut suliaqareerluni tusagassiornerup silarsuaanut uterami tusagassiortunut akissarsiaritinneqartartumi Prix Europamut piukkunneqartunut ilaavoq.

Ataqqinaammillu Frankrigimut aamma toqussi tikillugu konsuliuvoq, tassani franskit 2012-mi ridderitut saqqarmiulerneqarluni 'Ordre National du Mérite'-mik taaguutilimmik.

KNR Radioani aallakaatitassiornermi pisortatut 2012-mi atorfinitsinneqarpoq.

Henriette Rasmusseni ukiuni kingullerni kræftimut katsorsarteqattaareerluni nukissaqalerami ingerlaannaq suliffiminut uterpoq.

Atorfini 2015-imi Masaana Egedemut tunniukkaluarlugu KNR-mi nutaaliornini ingerlatiinnarpaa.
Ukiormi taanna nerisassiornermut tunngasumik aallakaatinneqartartoq Takanna Igajumatuut KNR TV-kkut aallakaatitassiaraa.

Uannga allaaserisamik allaaserinnittup Henriette Rasmusseni ilisarisimavaa taassumalu tunniussaqarusuttuunera, suleqatigalugu qanilaartoq pisunullu soqutiginnittutut eqqaaniarpaa.

Henriette Rasmussenip eqqaaneqarnera ataqqinartuuli

Najoqqutaq. Dansk kvindebiografisk leksikon

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER